Саха сирин үрдүнэн коронавирус тарҕаныыта күүһүрэр. Оттон өрөспүүбүлүкэ киин куоратыгар ыарыыга сутуллуу ахсаана намтаан иһэр. Ааспыт сууккаҕа 1018 ыарыы саҥа түбэлтэтэ арылынна, олортон 295-һэ — Дьокуускайга.
«Ыарыы тарҕаныытын тэтимэ 51 %-ҥа тэҥнэстэ. Дьокуускай куоракка ыарыы намтаабыт эбит буоллаҕына, оройуоннарга ыалдьыы 70 %-ҥа тэҥнэһэр», — диэн Ил Дархан Айсен Николаев коронавируһу бохсор суһал ыстаап мунньаҕар эттэ.
Ил Дархан ыарыы элбээбэтин туһуттан оройуон баһылыктарыгар тустаах эмп, анаалыһы ылар матырыйааллар баар буолалларын хонтуруоллуулларыгар соруйда. Итиэннэ кини саастаах дьоҥҥо, хат дьахталларга, дьарҕа ыарыылаах дьону кэтээн көрөллөрө наадатын бэлиэтээтэ.
«Ыалдьыбыт дьон суһаллык эмтэнэллэрэ, быраас сүбэтин ылаллара наада. Бу дельта-штаммы кытта эмиэ сибээстээх. Ыарыы улаата илигинэ тустаах көмөнү хас биирдии ыарыһахха оҥоруохха наада», — диир Айсен Сергеевич.
Маны таһынан Айсен Николаев ревакцинация үлэтин күүһүрдэргэ соруйда. Бүгүҥҥү күҥҥэ ревакцинацияны 58,8 % киһи ааспыт, оттон быһыы бастакы компоненын эрэгийиэҥҥэ 83 % киһи ылбыта биллэр.
«Ыарыы аччыырын туһугар ылынар миэрэлэрбитин салҕыахтаахпыт. Балаһыанньа тупсуутуттан көрөн, салгыы миэрэлэри сымнатыахпыт. Сорох оройуоннарга миэрэлэри сымнатар билиҥҥитэ эрдэ», — диэн мунньаҕы Ил Дархан түмүктээтэ.
Ил Дархан уонна Бырабыыталыстыба дьаһалтатын пресс-сулууспата
Андрей Сорокин хаартыската.