Дьокуускайга суол-иис оҥоһуллар. Онон кэлэргэ-барарга эргиирдээх, соччо табыгаһа суох курдук буолан, дьон-сэргэ үлэ-хамнас хаһан ситэрин-хоторун, түмүктэнэрин кэмэ суох кэтэһэллэр.
Оттон бу күннэргэ Дьокуускайга Ленин проспегын уонна Киров уулуссатын быһа охсуһууларынан массыыналар быстах кэмҥэ сылдьыахтара диэн иһитиннэрэллэр. Маннык соругу СӨ Бырабыыталыстыбатын бэрэссэдээтэлин бастакы солбуйааччы Дмитрий Садовников үлэ-хамнас хаамыытын билсэн баран эттэ.
Санатар буоллахха, Ленин проспегын саҥардан оҥоруу далааһыннаах үлэтэ ыытылларынан, суол бу учаастага билигин сабыылаах турар. Үлэ «Куттала суох хаачыстыбалаах суоллар» национальнай бырайыак иитинэн ыытыллар.
Ленин проспегар Орджоникидзе болуоссатыттан Курашов уулуссатыгар диэри аспаалы ууруу үлэтэ саҕаланна. Үлэ-хамнас хаамыытын билсэригэр, бастакы вице-премьер аспаалы уурууну Аммосов уулуссатыгар диэри салгыырга соруйда.
Маны сэргэ, итинник үлэ бу күннэргэ Өктөөп (Октябрьскай) уулуссатыттан Кулаковскай уулуссатыгар диэри саҕаланыахтаах. Оттон Аммосов уулуссатыттан Кировка диэри уонна Кировтан Октябрьскай (Өктөөп) уулуссатыгар диэри балаҕан ыйыгар оҥоһуллуохтаах. Уопсайынан ыллахха, проспегы аспааллааһын, Кулаковскай уулуссатыттан Дзержинскэй уулуссатыгар диэри, бэлисипиэтинэн сылдьар суолу уонна тротуардары оҥорууну балаҕан ыйын бүтүүтүгэр түмүктүүр былааннаахтар.
Дмитрий Садовников үлэ-хамнас хаамыытын билсэригэр, куорат санитарнай туругун эмиэ бэрэбиэркэлээтэ. Кини куорат үбүлүөйдээх сылын көрсөргө бэлэмэ суоҕун бэлиэтээн туран, куорат дьаһалтатыгар бөҕү-сыыһы хомуйуу үлэтин күүһүрдэргэ, Автострадаҕа Өктөөп 50 сыла уулуссаҕа көҥүлэ суох турар гаражтары ыларга соруйда.
+1
+1
+1
+1
+1
+1
+1