Айылҕа харыстабыла Сүрүн

Дьокуускайга Кэбээйи буруота кэллэ

Дьокуускайдааҕы гидрометеорология уонна тулалыыр эйгэни кэтээн көрөр управление иһитиннэрбитинэн, бүгүн хотуттан тыалыран, Дьокуускайга Кэбээйигэ турбут ойуур баһаардарын буруота кэллэ.

 

Бүгүн киин куоракка сөҥүү түһэрэ күүтүллүбэт, салгын  температурата  +26+28° кыраадыс итийиэҕэ.

Маннык буруолаах күннэргэ бэйэни хайдах харыстанарга СӨ Роспотребнадзора управлениета сүбэлиир.

– Олус итиигэ таһырдьа, аһаҕас халлаан анныгар сылдьаргын аҕыйат;

– Оҕолор оонньуур уонна үөрэх тэрилтэлэрин спордунан дьарыктанар былаһааккаларыгар сылдьалларын быстах кэмҥэ хааччахтаа;

– Организмы уунан хааччыйар туһуттан элбэхтик уута иһэ сырыт. Тоҕо диэтэххэ, олус куйааска көлөһүн тахсара элбиир уонна организмҥа уу аҕыйыыр;

– Организмҥа туус уонна микроэлеменнар аҕыйыылларын таһаарбат туһугар минераллаах-щелочтаах ууну, үүт-аһыы утахтары ис. Ол оннугар гаастаах утахтары иһимэ;

– Киһи куртаҕа чэпчэкитик буһарар уонна битэмииннээх бородуукталарынан аһаа; – Эт-сиин элэйэр ноҕуруускатын аҕыйата сатаа;

– Олус күүстээх буруоҕа тыынар уорганнары харыстыыр мааскалары, респиратордары уо.д.а. туһан. Олору сөп буола-буола инчэт, түннүк уонна аан хайаҕастарын инчэҕэй тирээпкэнэн сото сырыт, кондиционеры холбоо;

– Тыынар уорганы харыстанар тэриллэри ордук кырдьаҕас дьон, тыынар уорганнара эмсэҕэлиир уонна аллергиялаах оҕолор уонна улахан дьон туһаныахтаахтар;

– Дьиэҕэ мунньуллубут буортулаах веществолары суох оҥорорго күн аайы сииктээх тирээпкэнэн сото, сууйа сырыт;

– Итии салгын охсуутуттан уонна тириигэ киһи хараҕар көстүбэт буруо иҥиититтэн сэрэнэр туһуттан күҥҥэ хаста да душтан;

– Арыгылаах утахтартан, пиибэттэн уонна табахтан аккаастан;

— Доруобуйаҥ мөлтөөбүт курдугун биллэххинэ (сэниэҥ суох, мэйииҥ эргийэр, тыынаргар ыарахан, сөтөллөр, утуйбат буоллаххына) суһаллык бырааска көрдөрүн.

edersaas.ru

 

0
0