Бүгүн, кулун тутар 17 күнүгэр, 12:00 чааска Саха сирин бырабыыталыстыбатын бэрэссэдээтэлин солбуйааччы Ольга Балабкина эрэгийиэҥҥэ коронавирус балаһыанньатын туһунан брифиҥҥэ кэпсээтэ.
edersaas.ru
— Ааспыт сууккаҕа өрөспүүбүлүкэ үрдүнэн 30 киһи ыарыйда. Дьокуускайга — 20 киһи. Иккилии киһи Алдан, Бүлүү, Мэҥэ Хаҥалас, Нерюнгри, Өлүөхүмэ улуустарыгар ыарыйдылар.
Сууккаҕа 1959 тест оҥоһулунна.
Оруобуна биир сыл анараа өттүгэр Өрөспүүбүлүкэҕэ бастакы коронавируһунан ыалдьыбыт киһи биллибитэ. Былырыын бу күн, кулун тутар 17 күнүгэр, Дьокуускайдааҕы клиническэй балыыһаҕа аан маҥнайгы коронавирустаах пациент киирбитэ.
—Саҥа биллибэт ыарыыны утары охсуһууга биһиги өрөспүүбүлүкэбит үрдүнэн аҕыс тыһыынчаттан тахса быраас, мэдиссиинэ персонала туруммута. Кинилэргэ дириҥ махталбын тиэрдэбин. Чуолаан, Дьокуускайдааҕы клиническэй балыыһа кэллэктиибигэр, суһал көмө биригээдэлэригэр. Куттаммакка, маҥнайгынан эмтээбит быраастар – дьиҥнээх дьоруойдар, – диэн Ольга Балабкина быһа эпииргэ кэпсээтэ.
Виктория Бястинова, «Саха сирэ» хаһыат, edersaas.ru саайт.