Илиҥҥи экэнэмиичэскэй форум иккис күнүгэр ДОМ.РФ судаарыстыбаннай хампаанньа, өрөспүүбүлүкэтээҕи ипотечнай ааҕыныстыба уонна өрөспүүбүлүкэ бырабыыталыстыбата ГОСТ Р («күөх стандарт») киритиэрийдэригэр сөп түбэһэр элбэх кыбартыыралаах дьиэлэри сыаналыырга үс өрүттээх сөбүлэҥи түһэристилэр.
Сөбүлэҥ эбийиэктэринэн Дьокуускайга билигин тутулла турар уонна бырайыактанар дьиэлэр буолуохтара. Чуолаан диэн суруйдахха, «Звезднай» микро-түөлбэ уонна «Илин» кыбартаал.
Өрөспүүбүлүкэтээҕи ипотечнай ааҕыныстыба генеральнай дириэктэрэ Владимир Трегубов этэринэн, ГОСТ Р тупсаҕай уонна дьон олоҕор экология өртүттэн куттал суоһаабатын диэн сыаллаах оҥоһуллубут стандарт буолар. Манна уон хайысханан сыана быһыллыа, ол иһигэр архитектура, учаастак былаана, тутууну тэрийии, салайыы, тиэргэн тупсаҕайа, хаачыстыбата уо.д.а.