Дьокуускайга ититиини балаҕан ыйын 1 күнүттэн биэриэхтэрэ
Дьокуускай куоракка оттук сезона балаҕан ыйын 1 күнүттэн саҕаланыаҕа. Ититиигэ доруобуйа харыстабылын уонна социальнай эйгэ эбийиэктэрэ бастакынан холбонуохтара.
Маны кытта тэҥҥэ олорор дьиэлэри ититиигэ холбуохтара. Бу туһунан киин куорат баһылыга Евгений Григорьев «Россия 24» ханаалга «Прямой разговор с городом» биэриигэ кэпсээтэ.
«Сокуон быһыытынан, ититиини таһырдьа биэс күн устата аҕыс кыраадыстан аллараа турдаҕына биэрэн саҕалыахтаахтар. Ол эрээри, биһиги ону күүппэппит. Социальнай тэрилтэлэргэ балаҕан ыйын 1 күнүттэн ититиини биэрэн саҕалыахпыт. Хочуолунайдар үлэлэрин саҕалаатахтарына, олорор дьиэлэргэ ититиини биэрэргэ бэлэм буолуохпут», — диэн Евгений Григорьев этэр.
Баһылык этэринэн, Дьокуускайга 2943 элбэх кыбартыыралаах дьиэ баар. Онтон 95 бырыһыаныгар ититии систиэмэтин сууйан бэлэмнээбиттэр, 70 бырыһыана бэлэм буолбутун туоһулуур пааспары ылбыт.