Бэс ыйын 24 күнүттэн Арассыыйа инновацияҕа ассоциациятын үлэтэ саҕаланыаҕа. Манна дойду уонтан тахса эрэгийиэниттэн бэрэстэбиитэллэр кэлэн кыттыахтара.
Киэҥ ыҥырыылаах мунньахха сааҥсыйа усулуобуйатыгар оҥоһуллар өйөбүллэр дьаһалларын дьүүллэһиэхтэрэ.
Мунньах кыттыылаахтара ону сэргэ Дьокуускай куоракка ИТ-пааркаҕа сылдьан, өрөспүүбүлүкэ инновацияҕа экосистиэмэтин уонна инновация Арктикатааҕы киинин билсиэхтэрэ уо.д.а.
Бэс ыйын 25 күнүгэр инновациялаах эрэгийиэннэр ассоциацияларын бэрэстэбиитэллэрэ Туймаада Ыһыаҕар ыалдьыттыахтара.
Саха сирэ -– Уһук Илиҥҥэ инновация экосистиэмэтин сайыннарыга инники иһэр. ИТ-индустрияны өйөөһүҥҥэ систиэмэлээх үлэ көмөтүнэн эрэгийиэн сыл аайы бэйэтин көрдөрүүлэрин тупсарар уонна үрдүк технологиялаах салааны сайыннарар.
Өрөспүүбүлүкэ Ил Дархана Айсен Николаев урут иһитиннэрбитин курдук, Саха сирэ ИТ-эйгэни сайыннарыыга дойду уон эрэгийиэнин иһигэр Топ-10 киирсэр. Манна билигин балтараа тыһыынчаттан тахса киһи үлэлиир. Өрөспүүбүлүкэ 2024 сылга диэри биэс инники иһээччи иһигэр киирэр, онтон ИТ-га үлэлээччилэр ахсааннарын 10 тыһыынчаҕа диэри тириэрдэр соругу туруорунар.
Быһаарыы:
Ассоциация 2010 сыллаахха тэриллибитэ. Ассоциация састаабыгар Арассыыйа 18 эрэгийиэнэ киирэр. Саха сирэ -– 2019 сылтан ассоциация чилиэнэ.
Надежда ЕГОРОВА, «Саха сирэ», edersaas.ru