Бэҕэһээ, сэтинньи 20 күнүгэр, Дьокуускай куорат Каландаришвили уулуссатыгар турар биэс этээстээх дьиэҕэ баһаар буолан, иэдээн таҕыста — уокка икки оҕо былдьанна…
РФ Ыксаллаах быһыыга-майгыга министиэристибэтин Саха сиринээҕи управлениета иһитиннэрбитинэн, баһаар буолбутун туһунан тыллабыр «01» нүөмэргэ 17 ч. 23 мүн. киирбит. Баһаарынайдар ыйыллыбыт аадырыска 5 мүнүүтэнэн тиийбиттэрэ — кыбартыыраттан буруо тахса турар эбит.
Кыбартыыра 6 кв.м. иэнэ уокка былдьаммыт.
РФ Силиэстийэлиир кэмитиэтин Саха сиринээҕи управлениета иһитиннэрбитинэн, баһаарга икки оҕо — 2006 сыллаах төрүөх уол уонна 2013 сыллаах төрүөх кыыс — былдьаммыттар. Барыллаан биэрсийэнэн, уот турбут төрүөтүнэн ситэ умуллубатах сигарета буолуон сөп.
Маны тэҥэ, быһылаан буолбут сирин үөрэтэн көрүү түмүгэр биллибитинэн, оҕолор дьиэлэригэр иккиэйэҕин олорбуттар. Быһылаан сириттэн зажигалка уонна биир пачка сигарета көстүбүттэр.
Бу чахчынан силиэстийэ уорганнара процессуальнай бэрэбиэркэ ыыталлар. Ол түмүгүнэн, сэрэйдэххэ, сэрэҕэ суохтан икки киһини өлүүгэ тиэрдии бэлиэтэ баарынан, холуобунай дьыала тэриллиэҕэ.
Биһиги корр., «Саха сирэ» хаһыат, edersaas.ru
Хаартыска: интэриниэттэн