Дьокуускайга «ХVIII үйэ улуу эспэдииссийэлэрин бэлиэ миэстэлэрэ» өйдөбүнньүк дуоска арылынна
285 сыл анараа өттүгэр Улуу Хотугу эспэдииссийэ маҥнайгы этэрээтэ Саха сиригэр үлэтин саҕалаабыта. Петр I ыйааҕынан маҥнайгы уонна иккис Камчаткатааҕы эспэдииссийэлэр Арассыыйа хотугу уонна илиҥҥи кыраныыссаларын арыйбыттара. Онуоха Дьокуускай эспэдииссийэ материальнай-техническай тэриллэринэн хааччыйар киининэн буолбута. Онно айылҕа уонна уопсастыба научнай арыйыылара аан маҥнай Дьокуускайга түмүллүбүттэрэ.
edersaas.ru
Ол чэрчитинэн бүгүн, кулун тутар 17 күнүгэр, Дьокуускайга, Саха наукатын киинин дьиэтигэр «ХVIII үйэ улуу эспэдииссийэлэрин бэлиэ миэстэлэрэ» өйдөбүнньүк дуоска арылынна.
Үөрүүлээх тэрээһиҥҥэ Арассыыйа наукаларын академиятын бэрэсидьиэнэ, академик Александр Сергеев, Ил Түмэн судаарыстыбаннай мунньаҕын бэрэссэдээтэлэ Петр Гоголев, Ил Түмэн наукаҕа, үөрэххэ, култуураҕа, көрдөрөр-иһитиннэрэр эйгэҕэ уонна уопсастыбаннай түмсүүлэр бастайааннай кэмитиэтин бэрэссэдээтэлэ Федосия Габышева, Арассыыйа наукатын академиятын Сибиирдээҕи салаатын бэрэссэдээтэлэ Валентин Пармон, Арассыыйа наукатын академиятын Сибиирдээҕи салаатын Дьокуускайдааҕы киинин бэрэссэдээтэлэ Михаил Лебедев уо.д.а. кыттыыны ыллылар.
Арассыыйа наукатын академиятын Сибиирдээҕи салаатын Дьокуускайдааҕы киинин бэрэссэдээтэлэ Михаил Лебедев: «Арассыыйа империятын Улуу эспэдииссийэтэ Дьокуускайтан саҕаламмыта биһиги өйбүтүгэр–санаабытыгар хаалыахтаах”, — диэн санаатын үллэһиннэ.
Арассыыйа наукаларын академиятын бэрэсидьиэнэ, академик Александр Сергеев:
—Биллэн турар, өйдөбүнньүк дуоска оҥоһуллубута наһаа үчүгэй. Кэлэр көлүөнэ ыччат урукку устуоруйатын билиэхтээх. Ол эрээри, биһиги Саха сиригэр сырыыбыт диэн саха наукатын сайдар кэскиллэрин ырытыһыы, саҥа хайысханы тутуһары тобулуу буолар. Эһиги өрөспүүбүлүкэҕит сайдар кэскилэ, кыаҕа олус улахан. Сиртэн хостонор баайа буоллун, эдэр оҕолоргут оҥорон таһаарар бородуукталара буоллун. Ол эрээри, Саха сирин сүрүн хостонор баайа ырыынакка бэлэм бородуукта буолан тахсарыгар атын эрэгийиэннэргэ баран оҥоһуллар. Онон өрөспүүбүлүкэҕэ оҥорон таһаарыы бырассыаһын толкуйдуохха наада. Онно наука сүҥкэн оруоллаах, – диэн академик тыл эттэ.
Санатар буоллахха, академик Александр Сергеев Саха сиригэр үс күн устата сылдьан, саха наукатын кытары билсиэхтээх.
Виктория Бястинова, «Саха сирэ» хаһыат, edersaas.ru саайт
Ааптар хаартыскаҕа түһэриилэрэ.