Дьокуускайга худуоһунньук Мира Аргунова айар үлэтин быыстапката арылынна
Бүгүҥҥүттэн, кулун тутар 18 күнүттэн, Дьокуускайга Национальнай ойуулуур-дьүһүннүүр мусуой Лермонтов уулуссатыгар баар быыстапкалыыр саалатыгар худуоһунньук Мира Аргунова тус быыстапката арылынна.
Мира Аргунова аан бастаан киэҥ эйгэҕэ сахалыы алгыстаах открыткалары оҥорон биллибитэ. Бүгүҥҥү күнтэн Мира быыстапката бар дьоҥҥо аана аһаҕас. Манна эдэр худуоһунньук 50 хартыынаны туруорда. Кини айар үлэтин сэҥээрээччилэр биһирэбилэрин ылбыт хартыыналарын таһынан саҥа үлэлэр эмиэ бааллар.
Мин тус бэйэм ордук «Мечты сбываются» диэн «Сибиир күүһэ» бырайыакка анаммыт хартыынаны сөбүлүү көрдүм. Мира бу тула санаатын үллэһиннэ:
— Бу мин 9-с быыстапкам буолар. Бу быыстапкаҕа Култуура уонна искусство Арктикатааҕы институтугар «станковая живопись» салааҕа үөрэммит алта сыл иһигэр уруһуйдаабыт хартыыналарым турдулар. Уопсайа 50 хартыынаттан улахан аҥаара — саҥа уруһуйдар. «Мечты сбываются» диэн саҥа хартыынабын «Сибиир күүһэ» бырайыакка уонна норуоттар икки ардыларынааҕы доҕордуу сыһыаҥҥа анаатым.
Мира Аргунова айар үлэтин, хартыыналарын туһунан сиһилии «Саха сирэ» хаһыат кэлэр нүөмэригэр ааҕаарыҥ. Быыстапкаҕа Дьокуускай куорат Лермонтов аатынан уулусса 31/2Б №-дээх дьиэтигэр баар аадырыһынан муус устар 18 күнүгэр диэри сылдьыаххытын сөп.
Ульяна Захарова, edersaas.ru