Бүгүн, балаҕан ыйын 1 күнүгэр, Дьокуускай куоракка Гагарин уокуругар «Хотугу остуоруйа» диэн уһуйаан аһылынна. Иитээччилэри, иитиллээччилэри Ил Дархан Айсен Николаев эҕэрдэлээтэ.
«Икки сыллааҕыта манна саҥа уһуйаан бастакы сыбаайата турбута, оттон бүгүн 3000 кв. м. иэннээх үс мэндиэмэннээх уһуйаан үлэҕэ киирдэ. Уһуйаан федеральнай уонна өрөспүүбүлүкэтээҕи бүддьүөт үбүнэн тутулунна. Оҕолор уонна үлэһиттэр күүппүттэрин курдук туох барыта баар, барынан хааччылынна. Манна куораппыт кырачаан олохтоохторо сайдалларыгар, дьоҕурдарын арыйалларыгар туох баар усулуобуйалар тэрилиннилэр», — диэн Ил Дархан эттэ.
Саҥа уһуйаан 240 миэстэлээх. Үс этээһинэн 12 бөлөҕүнэн оҕолор сылдьыахтара, итиэннэ уһуйааҥҥа физкултуура саалата, мэдиссиинэ блога, аһыыр, таҥас сууйар хостор, күүлэйдиир веранда, лифт бааллар.
Андрей Сорокин хаартыскалара.