Дьокуускайы ис сүрэхтэриттэн таптааччылар форумнарын аһыллыытыгар, бэҕэһээ, Орджоникидзе болуоссатыгар «Цветущий Якутск» диэн үгэс буолбут флористар куонкурустара буолла.
Дьокуускай куорат төрүттэммитэ 385 сыллаах үөрүүлээх күнүгэр анаммыт куонкуруһу куорат дьаһалтатын Урбааҥҥа, потребительскай ырыынакка, туризмы сайыннарыыга уонна тырааныспарга департамена тэрийэн, иилээн-саҕалаан ыытта.
Куонкуруска «Kiali flowers» сибэкки лааппыта, «Цветочная кухня» маҕаһыын, «Город цветов» флористика салона, «Time flowers» сибэкки мастарыскыайа уонна сибэккинэн сөбүлээн дьарыктанар Ирина Верашкина кытыннылар. Күөн күрэс кыттыылаахтара декоративнай матырыйааллары тыыннаах сибэккилэргэ холбоон, киэргэтэн кыраһыабай сибэкки дьөрбөлөрүн, композициялары оҥорон көрдөрдүлэр. Кинилэр үлэлэрин урбаанньыттар департаменнарын начаалынньыга Ирина Гаргач, куорат дьаһалтатын потребительскай ырыынакка отделын кылаабынай исписэлииһэ Наталья Слепцова, Култуура уонна духуобунай сайдыы управлениетын култуурунай-маассабай үлэлэргэ киинин менеджерэ Василина Кривошапкина сыаналаатылар.
Түмүккэ «Дьокуускай куорат 385 сылыгар анаммыт сибэккинэн бастыҥ композиция» анал аат кыайыылааҕынан «Город цветов» флористика салона уонна «Time flowers» сибэкки мастарыскыайа буоллулар. «Сибэкки дьөрбөтүн оҥорууга ураты» диэн анал ааты «Kiali flowers» сибэкки лааппыта ылан үөрдэ. «Сибэкки дьөрбөтүн киэргэтиигэ бастыҥ» номинация кыайыылааҕынан «Time flowers» флористара таҕыстылар.
«Бары олус кырасыабай композициялары оҥорон сөхтөрдүлэр, үөртүлэр. «Kiali flowers» флористара үрүҥ розаларынан Дыгын башнятын оҥорбуттара көрүөхтэн дьикти кэрэ. Аны декоративнай киэргэллэри сатабыллаахтык туһанан, дьэрэкээн лыахтарынан, кып-кырачаан хомурдуостарынан, лиэнтэлэринэн, оҕуруоларынан сибэккилэр дьөрбөлөрүн киэргэтэн-тупсаран биэрбиттэрин киһи эрэ сөҕө, хайгыы көрөр», — диэтэ Наталья Слепцова.
Дохсун ытыс тыаһынан доҕуһуоллатан кыайыылаахтарга дипломнар уонна харчынан бириэмийэлэр туттарылыннылар. Куонкуруска кыттыбыт дьоҥҥо барыларыгар сертификаттар бэрилиннилэр. Долгутуулаах уонна үөрүүлээх тэрээһин бүтүүтэ, флористар сибэккилэри мустубут ыалдьыттарга тарҕаттылар.
Дьокуускай куорат дьаһалтатын Уопсастыбаннаһы, МИС кытта үлэҕэ департамена