Дьокуускай куорат дьаһалтата кулун тутар 24 — 30 күннэригэр үс уонна онтон элбэх оҕолоох ыалларга 196 сир учаастагын түҥэтиэҕэ. Учаастактар Тулагы-Киллэм нэһилиэгэр бааллар. Сир учаастактарын үллэрии тэрээһининэн «Агентство земельных отношений» МКУ дьарыктанар.
Дьокуускай куоракка босхо сир учаастагын ылыы уочаратыгар 6,5 тыһыынча элбэх оҕолоох ыал турар. Бу туһунан Дьокуускай куорат дьаһалтатын баайга-дуолга уонна сир сыһыаннаһыыларыгар департаменын начаалынньыга Игнатий Попов иһитиннэрдэ.
«Сир учаастактарын түҥэтии тэрээһинэ уһун кэмҥэ тохтуу сылдьан баран, дьэ сөргүтүлүннэ. Бүтэһигин элбэх оҕолоох ыалларга учаастактар 2017, 2018 сылларга үллэриллибиттэрэ. Билиҥҥи туругунан Киллэмҥэ 257 учаастак баарыттан, билигин 196-та бэлэм турар. Докумуоннара бэлэм буолла да учаастактар бэриллиэхтэрэ», — диэн Игнатий Попов эбэн эттэ.
Сир учаастактара ИЖС-ка бэриллэллэр. Инникитин оскуола уонна оҕо саада тутуллара былааннаммыт.
Сиһилии иһитиннэриини http://yakutskcity.ru киирэн көрүҥ.
edersaas.ru