Кулун тутар 25-31 күннэригэр Дьокуускай куоракка ыытыллар Үөһээ Дьааҥы улууһун күннэрэ САССР тэриллибитэ 100 сылыгар ананыахтара.
«Киирбэт күннээх дойду – ытык Дьааҥы» бырагыраамаҕа Арктика биир кэрэ сирин -– Үөһээ Дьааҥыны кэпсиир, көрдөрөр, билиһиннэрэр кэккэ дьаһаллар киллэрилиннилэр.
Кулун тутар 25 күнүгэр Үөһээ Дьааҥы күннэрэ Хотугу сир норуоттарын устуоруйатын уонна култууратын мусуойугар «Тымныы оройо» улуустааҕы кыраайы үөрэтэр мусуой быыстапкатынан аһыллыахтара.
Кулун тутар 26 күнүгэр 11.00 чаастан Норуот айымньытын дьиэтигэр Христофор Васильев «Дьыбардаах дьылҕаҥ эйиэнэ» диэн кинигэтэ сүрэхтэниэҕэ.
14.00 чаастан П.А.Лазарев аатынан Мамонт мусуойугар (Кулаковскай уул. 48) Үөһээ Дьааҥы улууһун чинчийээччилэрин уонна энтузиастарын дьикти булумньуларын палеонтологическай быыстапката арыллыаҕа.
Кулун тутар 27 күнүгэр 11 чаастан Национальнай бибилэтиэкэ Историческай саалатыгар «Дьааҥы сахалара: А.А..Саввин хотугу эспэдииссийэтин матырыйааллара» кинигэ сүрэхтэниитэ тэриллиэҕэ.
Бу күн 14.00 чаастан «Үлэ киһитэ албан аатырдын» аахсыйа ыытыллыаҕа.
Эмиэ бу күн 15.00 чаастан СӨ Суруйааччыларын сойууһун чилиэнэ Раиса Чирикова «Араҕас саҕах анараа өттүгэр» диэн кинигэтин билиһиннэриэҕэ. Кинигэҕэ Аҕа дойду Улуу сэриитигэр тыыл үлэһиттэрин кылааттарын, оччотооҕу ыарахан кэм дьонун, кинилэр ыар дьылҕаларын уонна албан ааттаах устуоруйатын туһунан кэпсэнэр.
Ону таһынан куорат олохтоохторо уонна ыалдьыттара Саха сирин норуоттарын муусукатын уонна фольклорун мусуойугар (Киров уул. 31) «Мин төрөөбүт кыраайым -– Үөһээ Дьааҥы» хартыыналар быыстапкаларын сэҥээрэ көрүөхтэрэ.
Кулун тутар 28 күнүгэр 14.00 чаастан Аан дойду норуоттарын хомуһун мусуойугар «Лики гражданскай войны»» быыстапкаҕа күүтэллэр.
Күнүс 16.00 чаастан СӨ Судаарыстыбаннай Мунньаҕын (Ил Түмэн) дьокутааттара Үөһээ Дьааҥы улууһун дэлэгээссийэтин кытары көрсүөхтэрэ. Көрсүһүү уопсастыбаннай-бэлитиичэскэй диэйэтэл, САССР Декларациятын уонна Төрүт сокуонун бэлэмниир хамыыһыйа сэкирэтээрэ, Саха сиринээҕи быстах кэмнээх уобаластааҕы управление бэрэссэдээтэлэ Георгий Семенович Ефимов төрөөбүтэ 130 сылыгар ананар.
Кулун тутар 29 күнүгэр Бырабыыталыстыба 2 №-дээх дьиэтигэр «Үөһээ Дьааҥы улууһун социальнай-экэнэмиичэскэй сайдыыта» диэн «төгүрүк остуол» ыытыллыаҕа.
Кулун тутар 30 күнүгэр Үөһээ Дьааҥы улууһун устудьуоннарын кытары көрсүһүү ХИФУ учуонай сэбиэтэ мунньахтыыр саалатыгар (Белинскэй уул. 58) буолуоҕа.
Кулун тутар 31 күнүгэр 14.00 чаастан «Сэргэлээх уоттара» Култуура киинигэр «Айар кут абылаҥа, уран иис утаҕа» быыстапкаҕа улуус декоративнай-прикладной ускуустубутын көрдөрүөхтэрэ.
Бу күн 16.00 чаастан «Үөһээ Дьааҥы деликатестара» быыстапка-дегустацияҕа ыҥыраллар.
18.00 чаастан «Сэргэлээх уоттара» Култуура киинигэр «Дьааҥым мин сүрэхпэр» бырааһынньыктааҕы кэнсиэринэн Үөһээ Дьааҥы улууһун күннэрэ түмүктэниэхтэрэ.
Билиэттэр «Киин» киинэ тыйаатырын каассатыгар атыыланаллар (700 солкуобай).
Манна сыһыаран эттэххэ, Саха АССР тэриллибитэ 100 сылын бэлиэтиир сүҥкэн элбэх тэрээһиннэр улууска саҕаланнылар. Үөһээ Дьааҥыттан тахсыбыт чаҕылхай дьон: учуонай, этнограф Никита Семенович Горохов уонна бэлитиичэскэй диэйэтэл Афанасий Иннокеньевич Новгородов, Новгородовтар, Ефимовтар ааттарын үйэтитэргэ «Үөһээ Дьааҥы чулуу уолаттара» диэн киэҥ кэпсэтиилээх «төгүрүк остуоллары» тэҥэ, кинигэлэр сүрэхтэниилэрэ ыытыллыахтара.
Надежда ЕГОРОВА, «Саха сирэ», edersaas.ru