Дьокуускайга эдэр худуоһунньуктар уонна фотографтар быыстапкалара арылынна
«Үргэл» арт-галереяҕа «Оҕо сааһым күнэ» диэн ааттаах бэйэлэрин баҕаларынан уруһуйдуур уонна хаартыскаҕа түһэриинэн дьарыктанар эдэр дьон быыстапка-куонкурустара үөрүүлээх быһыыга-майгыга арылынна. Бу туһунан биһиэхэ Якутск.рф. ,Дьокуускай куорат дьаһалтатын уопсастыбаннаһы уонна иһитиннэрэр-биллэрэр маассабай сириэстибэлэри кытары үлэҕэ Департаменыттан иһитиннэрдилэр.
Бу бэртээхэй тэрээһини Дьокуускай куорат уокуруктааҕы дьаһалтатын култуураҕа уонна духуобунай сайдыыга управлениета, аҕыйах ахсааннаах хотугу норуоттар ассоциациялара тэрийдилэр. Быыстапкаҕа 60-тан тахса үлэ туруорулунна. Үлэлэри профессиональнай дьүүллүүр сүбэ сыаналыахтаах. Кыайыылаах СӨ норуотун хаһаайыстыбатын үтүөлээх үлэһитэ, Арассыыйа Худуоһунньуктарын сойууһун чилиэнэ Иосиф Алексеевич Николаев аатынан бириэмийэҕэ тиксиэхтээх диэн этэллэр.
«Иосиф Николаев талааннаах улахан маастар этэ. Кини аатын үйэтитэр сыаллаах-соруктаах биһиги эдэр худуоһунньуктар уонна фотографтар быыстапка-куонкурустарын тэрийдибит. Манна аҕыйах ахсааннаах хотугу норуоттар бэрэстэбиитэллэрэ кытыннылар. Кинилэр бары бэйэлэрэ сөбүлээн уруһуйдуур, хаартыскаҕа түһэрэр дьон. Онон бу тэрээһин биир санаалаахтары түмүөҕэ, итиэннэ айар дьоҕурдарын үрдэтэллэригэр тирэх буолуоҕа, — диир «Үргэл» арт-галерея дириэктэрэ Юрий Спиридонов. Быыстапкаҕа барыта 18 киһи кытынна.
«Мин үс үлэбин дьон сыанабылыгар, көрүүтүгэр-истиитигэр аҕаллым. Бу «Мечты видения» хартыынабын сылтан ордук оҥорбутум. Икки кэм алтыһыытыгар олорор кыыс инникини ыраланан көрөрүн туһунан кэпсэнэр«, — диэн куонкуруска кыттааччы Екатерина Суржанинова кэпсиир.
Аан дойдуга төрүт олохтоох норуоттар күннэрин чэрчитинэн ыытыллыбыт күрэс түмүгэ сарсын Орджоникидже болуоссатыгар буолуоҕа. Онно Гран-при уонна номинациялар кыайыылаахтарын эҕэрдэлиэхтэрэ.
