Дьокуускайга эдэр чинчийээччилэр муһуннулар

Ааптар: 
Бөлөххө киир:

Норуоттар икки ардыларынааҕы интеллектуальнай оонньуу түмүктэнэрэ аҕыйах хонук хаалла. Бүгүн Хотугулуу-Илиҥҥи федеральнай университекка үөрэнээччилэр билимҥэ норуоттар икки ардыларынааҕы кэмпириэнсийэ-куонкурустарын аһыы үөрүүлээх сиэрин-туомун ыыттылар.

edersaas.ru

Санатан аастахха, Норуоттар икки ардыларынааҕы бастакы кэмпириэнсийэ-куонкурус 2018 сыллаахха маҥнайгы Интеллектуальнай оонньуулар иитинэн тэриллибитэ. 2019 сыллаахха иккис кэмпириэнсийэ буолбута. Икки сыл тохтоон баран бу үһүс сырыыта.

СӨ үөрэҕин уонна билимин миниистирин бастакы солбуйааччы Алевтина Аргунова: “Норуоттар икки ардыларынааҕы научнай кэмпириэнсийэҕэ араас эрэгийиэннэртэн кыттааччылар кэллилэр. Кэмпириэнсийэ оҕолор билимҥэ үрдүк таһымҥа тахсалларыгар кыах биэриэҕэ. Билим күннэтэ сайда турар. Биһиги оҕолорбут манна бэлэм буолуохтаахтар. Санаа атастаһар, саҥа технологиялары, билимҥэ хайысхалары көрдүүр былаһаакканан буоларыгар эрэнэбин”, — диэн эттэ.

ХИФУ анал үөрэтэр-научнай лиссиэйин дириэктэрэ, кэмпириэнсийэ-куонкуруһу тэрийээччи Милана Федотова иһитиннэрбитинэн, быйылгы тэрээһин бастакы түһүмэҕэ бэс ыйын 15 күнүгэр диэри ыытыллыбыт. Үс дойдуттан, Арассыыйа 5 эрэгийиэниттэн, Саха сирин 17 улууһуттан 140 үөрэнээччи 113 дакылааты киллэрбит. Олортон эспиэртэр бастыҥнары талбыттар. “Иккис түһүмэххэ 100  оҕо кыттар, итинтэн 80 оҕо — олоҕурбут көрүҥүнэн. Биһиги аан дойду оҕолоро бары айымньылаах, тугу эрэ оҥорор баҕалаах, билими сайыннарар соруктаах буоллалларыгар баҕарабыт”, — диэн бэлиэтээтэ.

Бүгүн сиэксийэнэн үлэлэр, сарсын эспиэртэргэ уонна билими сэҥээрэр, дьарыктанар уопсастыбаннас киэҥ араҥатыгар аналлаах постернай сессия буолар. Сарсыарда 10 чаастан ХИФУга (КВЕН) ыҥыраллар.

Владислав Уваров, Амма лиссиэйин үөрэнээччитэ:

— Мин Амма өрүс хочотугар үүнэр улахан силистээх пузырчатка биологическай уратыларын үөрэтэбин. Бу чинчийиллэ илик тиэмэ, интэриэһинэй. Тоҕо диэтэххэ, ууга баар сиэмэх үүнээйи ахсааннаах. Салайааччым – биология учуутала А.В. Быстрова. Тустаах тиэмэни үһүс сылын чинчийэбин. “Инникигэ хардыы” научнай-практическай кэмпириэнсийэҕэ кыттыбытым. Норуоттар икки ардыларынааҕы тэрээһиҥҥэ бастакытын холонобун. Биһиги бу үүнээйи биологическай уратыларын чинчийэбит. Тустаах үүнээйи уһун кэм устата сайдыы түмүгэр сиэмэх (питается хищным образом) буолбут. Бу туох эрэ төрүөттээх, суолталаах буолуон сөп диэн сабаҕалыыбыт. Интеллектуальнай оонньуулартан мин ситиһиини эрэйэбин, элбэх доҕордонуом диэн эрэллээхпин, — диэн этэр.

Людмила ПОПОВА, “Саха сирэ” хаһыат, edersaas.ru

+1
0
+1
0
+1
0
+1
0
+1
0
+1
0
+1
0