Дьокуускайга “Дууһабыт эдэр” волонтердар “үрүҥ көмүс” кииннэрин астылар
Дьокуускайга Юрий Гагарин аатынан култуура уонна аныгы искусство киинигэр “Дууһабыт эдэр” “үрүҥ көмүс” волонтердар кииннэрэ аһылынна диэн СИА иһитиннэрэр.
“Үрүҥ көмүс” волонтердар – бу көхтөөх уонна олоххо көҕүлүүр баҕалаах аҕа саастаах дьон. Бочуоттаах сынньалаҥҥа тахсан баран үгүс Саха сирин олохтооҕо үөрэхтэрин салгыыллар, сайдаллар уонна туох даҕаны харданы эрэйбэккэ үтүө дьыаланан дьарыктаналлар.
“Саха сирин “үрүҥ көмүс” волонтердара норуоттар икки ардыларынааҕы уонна Бүтүн Арассыыйатааҕы пуорумнарга ыччаты кытта тэҥҥэ көхтөөхтүк кыттыбыттарын бэлиэтиэхпин баҕарабын. СӨ Ил Дархана Айсен Николаев гражданскай уопсастыба сайдыытын үчүгэйдик өйүүр. Былырыын аан маҥнайгытын Ил Дархан граныгар куонкуруһу ыыппыппыт, онно “волонтерство” хайысхата баар. Былырыын 8 мөлүйүөн солкуобай көрүллүбүтэ, быйыл үбүлээһин сууматын икки бүк үрдэтэри былаанныыбыт. Ол иһин үрүҥ көмүс волонтердары куонкуруска көхтөөхтүк кытталларыгар ыҥырабын”, — диэн өрөспүүбүлэ ыччатын миниистирэ Степан Саргыдаев кэпсиир уонна “Дууһабыт эдэр” киин аһыллыбытынан эҕэрдэлиир.
“Дууһабыт эдэр” волонтердар кииннэрин сүрүн соругунан, көхтөөх аҕа саастаах дьон олохторун хаачыстыбатын үрдэтэр, социокультурнай эйгэ волонтердуур үлэтигэр кытыннарар, уопсастыбаннай суолталаах бырайыактары уонна көҕүлээһиннэри олоххо киллэрэр соруктаах.
Тустаах кииҥҥэ 55-тэн 65-гэр диэри саастаах дьоҥҥо үөрэх бырагыраамаларын хайысхалара үлэлииллэр: кырыйан тигиигэ үөрэтэр “Үрүҥ көмүс иннэ”, үҥкүүгэ үөрэтэр «Ретро-dance» маастар-кылаастар, көмпүүтэр кырааматынаһыгар, куйаар ситимин уонна социальнай ситимнэри баһылыырга үөрэтэр «Old-IT-school», уруһуй тиэхиньикэтигэр уһуйар «Живая кисть», викториналарынан, остуол оонньууларынан, квизтэринэн дьарыгырдар «Эврика», декоративнай-прикладной искусствоҕа үөрэтэр «Бабушкин сундук» салаалара; «Олохпут барыта тыйаатыр» тыйаатыр, «Горизонт» ырыа устуудьуйалара, хор, видуону таҥарга үөрэтэр «Видеомонтаж». Инники тутар бырайыактарынан Аҕа дойду Улуу сэриитигэр “Аляска-Сибиир” авиа трассаҕа анаммыт “Саха сирин авиациятын түмэлэ” кэллиэксийэни харыстыырга туһаайыллыбыт “Үрүҥ көмүс кынат” бырайыактара буолар.