Маны аах Уопсастыба

Дьокуускайга дьуһуурунай оҕо саада үлэлээтэ

Сэтинньи 1 күнүттэн Дьокуускайга уһун өрөбүл күннэри биллэриллибиттэринэн, “Золотой ключик” диэн 85 №-дээх дьуһуурунай оҕо саада үлэтин саҕалаата. Бу уһуйаан сэтинньи 1, 2, 3 күннэригэр үлэлиэҕэ диэн СИА иһитиннэрэр.

Бу өрөбүл күннэргэ үлэлиир буолан, маннык уһуйааҥҥа наадыйар төрөппүттэр испииһэктэрэ эрдэттэн оҥоһуллубута. “Золотой ключик” уһуйаан сэбиэдиссэйэ Алена Абрамова эппитинэн, испииһэккэ 128 оҕо сылдьара суруллубута.

— Бүгүҥҥү күҥҥэ уһуйааҥҥа 105 оҕо сылдьар. Алын бөлөххө – 20, орто бөлөххө – 29, улахан бөлөххө – 35, бэлэмнэнии бөлөҕөр – 21 оҕо баар. Сорох оҕолор кэккэ биричиинэнэн кэлбэтилэр.

Уһуйааммытыгар санитарнай ирдэбиллэри кытаанахтык тутуһабыт. Үлэһиттэрбит бары быһыыны ылбыттара. Биһиги уһуйааммытыгар үлэһиттэр уонна оҕолор истэригэр коронавируһунан ыалдьыы түгэннэрэ бэлиэтэнэ иликтэр.

Дьуһуурунай оҕо саадыгар киирэргэ төрөппүттэр оҕо доруобайын туһунан ыспыраапканы уонна сылдьыбыт уһуйааныгар харантыын суоҕун бигэргэтэр суругу аҕалбыттара, — диэн Алена Абрамова кэпсээтэ.

Ангелина Васильева, “Саха сирэ” хаһыат, edersaas.ru

Хаартыска: sakhagov.ru

0
0
Telegram @edersaas20