Олунньу 23-24 күннэригэр СӨ дьокутааттарын VII спартакиадата Дьокуускайга бэрт ньиргиэрдээхтик буолан ааспытын туһунан Таатта улууһун физическэй култуураҕа уонна спорка кэмитиэтин салайар Гаврил Вырдылин иһитиннэрдэ. Күөн күрэскэ улуустардааҕы, нэһилиэктэрдээҕи сэбиэттэр дьокутааттара кыттыбыттар.
— Түһүлгэҕэ уопсайа 16 хамаанда күөн көрүстэ. Түмүк икки бөлөҕүнэн: хоту уонна киин улуустар диэн таһаарылынна.
Хамаандалар волейболга, дартс быраҕыытыгар, баскетболга, мээчиги корзинаҕа быраҕыыга, миэстэттэн туран ырааҕы ыстаныыга (хамаанданан) илин-кэлин түһүстүлэр.
Уопсай түмүккэ II-с бөлөххө 1 миэстэни Өлөөн хамаандата ылла. Иккискэ – Кэбээйи, үһүскэ – Томпо хамаандалара таҕыстылар. I бөлөххө Сунтаар улууһа бастаата. Иккискэ Ил Түмэн халыҥ хамаандата таҕыста. Намнар үһүс буолан үөрдүлэр. Бириистээх миэстэлэргэ тиксибиттэргэ грамоталар уонна мэтээллэр туттарылыннылар.
Таатта улууһун хамаандата волейболга төрдүс миэстэ, дартска – бэһис, миэстэттэн туран ырааҕы ыстаныыга – 2-с, баскетбол мээчигин быраҕан корзинаҕа киллэриигэ – 12-с миэстэ буоллулар. Үс көрүҥ түмүгүнэн иккис миэстэҕэ сылдьаннар, баскетболга мээчиги кыл мүччү киллэрбэккэлэр, хамаанданан түмүккэ бэһис миэстэҕэ таҕыстылар. Онон эһиил эрдэттэн ох курдук оҥостон, бэлэмнэнэн кэлэн, хайаан да бириистээх миэстэҕэ тиксэр курдук сүбэлэстилэр, — диэн кэпсээтэ.
Түһүлгэҕэ мустубут дьокутааттар спартакиада сибээһи бөҕөргөтөрүн, бу күрэхтэһии эрэ былаһаакката буолбакка, санаа атастаһыы былаһаакката эмиэ буоларын бэлиэтээбиттэр. Күөн күрэскэ сүүрэн-көтөн улаханнык астыммыттар. Эһиил өссө сытыы киирсиилэр буолуохтарыгар эрэнэллэрин биллэрбиттэр.
Сардаана БАСНАЕВА, “Саха сирэ” хаһыат, edersaas.ru