Маны аах Уопсастыба

Дьокуускайга дьоһуннаах пааматынньык арылынна

Бүгүҥҥү бэлиэ, Саха Өрөспүүбүлүкэтин судаарыстыбаннаһын күнүгэр, Сахабыт сирин киин куоратыгар Семен уонна Софрон Даниловтарга өйдөбүнньүк бэлиэ (пааматынньык) арыллыытын үөрүүлээх түгэнэ буолла.

Саха норуотун чулуу уолаттарын, норуодунай суруйааччы уонна норуодунай бэйиэт пааматынньыктара куорат киинигэр искибиэргэ (Ленин уулуссатын 36 №-рэ) туруорулунна.
Пааматынньыгы арыйыы үөрүүлээх тэрээһинигэр СӨ Ил Дархана Айсен Николаев, Горнай улууһун баһылыга Никита Андреев, Софрон Данилов кыыһа, философия наукатын доктора, ХИФУ профессора Вера Данилова, ону сэргэ бырабыыталыстыба чилиэннэрэ, норуот дьокутааттара, Саха сирин суруйааччыларын холбоһугун чилиэннэрэ, Горнай оройуонун бэрэстэбиитэллэрэ кыттыыны ыллылар.
«Элбэх доҕордуу норуоттаах Саха сирин сайдыытыгар ини-бии Даниловтар кылааттара муҥура суох улахан», — диэтэ Айсен Николаев. Кини саха норуотун кутун-сүрүн туппут, өйүн-санаатын түмпүт духуобунай лиидэрдэр — бырааттыы Даниловтар үтүө холобурдара сырдык эркээйи буола туруохтарын бэлиэтээтэ.
«Талааннаах архитектор Алексей Самсонов, скульптор Семен Прокопьев уонна кинилэр кэллиэгэлэрин  сыралаах үлэлэринэн бырааттыы Даниловтар уобарастарын көрдөрөр скульптура оҥоһуллан, чочуллан таҕыста», — диэтэ Вера Данилова. СӨБырабыыталыстыбатыгар, Горнай улууһун уонна Дьокуускай куорат дьаһалталарын үлэһиттэригэр, ааптарга, худуоһунньуктарга уонна пааматынньыгы оҥорорго бу сыллар усталарыгар кыттыбыт бар дьоҥҥо барыларыгар махтанна.
Айсен Николаев САССР 100 сылынан Ленин проспегын саҥалыы уларытан оҥоруу иитинэн, пааматынньык туруоруллубут сирэ киин куорат олохтоохторун уонна ыалдьыттарын биир саамай сөбүлээн сылдьар сирдэринэн буолуоҕар эрэнэрин биллэрдэ.
Семен Данилов (1917-1978) – саха норуодунай бэйиэтэ, М.Горькай аатынан РСФСР судаарыстыбаннай бириэмийэ лауреата, Польша норуодунай өрөспүүбүлүкэтин искусстотын үтүөлээх диэйэтэлэ, ССРС уонна САССР суруйааччыларын сойууһун чилиэнэ.
Софрон Данилов (1922-1993) – өрөспүүбүлүкэ биллэр уопсастыбаннай, бэлитиичэскэй диэйэтэлэ, РФ култууратын үтүөлээх үлэһитэ, САССР Үрдүкү Сэбиэтин X уонна XI ыҥырыыларын дьокутаата, саха норуодунай суруйааччыта, М.Горькай аатынан РСФСР судаарыстыбаннай бириэмийэтин лауреата, П.А.Ойуунускай аатынан СӨ судаарыстыбаннай бириэмийэтин лауреата, ССРС уонна ССРС КГБ-н бириэмийэлэрин лауреата, саха комсомолун бириэмийэтин лауреата.
Мария Васильева (СИА) хаартыскаларга түһэриитэ
0
0