Бүгүн, олунньу 14 күнүгэр, Дьокуускай куорат баһылыга Евгений Григорьев куорат уопсай сугулааныгар ыттаах хаһаайыттарга өйдөтүү үлэтин ыытар туһунан сорудахтаата.
Бэйдиэ сылдьар ыттары тутууга үгүс сайаапка чааһынай сектордартан, чуолаан элбэх сайаапка Автодорожнай, Сайсары уонна Бырамыысыланнай уокуруктар олохтоохторуттан киирэрэ бэлиэтэммит.
«Хаһаайыттар ыттарын эмиэ көҥүл ыытан эрэллэр. Бу уокурук дьаһалталара бэтэринээрийэ департаменын кытта сэрэтэр, өйдөтөр үлэлэри ыытаргыт наада. Хаһаайына суох ыт бэйдиэ сылдьыа суохтаах. Ону сэргэ санитарнай туочукалары хонтуруоллааҥ, кэмигэр бөҕү тиэйиини тэрийиҥ», — диэн соруйда.
Маны таһынан, Дьокуускайга Очиченко уулусса 57-тигэр баар ыттары тутар пуун кэҥэтиллибитинэн, бу нэдиэлэҕэ Автодорожнай уулусса 14 аадырыһыгар баар быстах пуунтан ыттары көһөрүү саҕаланар. СЭГХ дириэктэрэ Владимир Аммосов иһитиннэрбитинэн, үлэ олунньу ый устата ыытыллыахтаах.
Ульяна ЗАХАРОВА.