Дьокуускайга дьаҥ аччаабыт, оттон атын оройуоннарга?
Бүгүн өрөспүүбүлүкэҕэ дьаҥы бохсууга суһал ыстаап салайааччытын солбуйааччы Ольга Балабкина уочараттаах брифинин ыытта. Кини этэринэн, дьаҥ хаптайан эрэр курдук. Роспотребнадзор Саха сиринээҕи управлениетын чахчытынан, бүгүҥҥү туругунан 88 киһи ыалдьыбыта биллибит. Дьокуускай куоракка ыарыы аччаан иһэрэ бэлиэтэнэр – 38 киһи дьаҥнаабыт. Ол эрээри Мииринэйгэ балаһыанньа туруга суох диэтэ Ольга Валерьевна. Бу оройуоҥҥа ыалдьыы ахсаана – 16 киһи. Томпо улууһа эмиэ долгутар (11 киһи). Уонна Алдан оройуонугар даҕаны балаһыанньа ыгым соҕус.
Ыстаап салайааччытын солбуйааччы бэлиэтээбитинэн, 14 муниципальнай тэриллиигэ дьон коронавируска хаптарбыт буоллаҕына, итинтэн 8 оройуоҥҥа 1-тэн 5 диэри киһи ыалдьыбыта биллэр.
Ааспыт сууккаҕа 2200 чинчийии ыытыллыбыт. Билигин ИВЛ аппараатыгар үксүн аҕам саастаах дьону холбообуттар.
Салгыы кини быһыыны ылыы боппуруоһугар тохтоото. Ол курдук, 25491 киһи быһыы ылбыт. Вакцина кэлэрин кэтэһэллэр. “Быһыы ыларга суруйтарбытым уонна биэрэллэрин көһөрдүлэр диэн – туох да куттала суох көстүү”, — диэтэ О.Балабкина. Бэнидиэнньиккэ вакцина кэлиэҕэ диир. Уопсайынан ыллахха, бары оройуоннарга уонна Дьокуускайга быһыыны биэрии ыытылла турар. Дьокуускайга 10387 киһи ылбыт. Ленскэйгэ уонна Чурапчыга бытаарыы баара бэлиэтэммит.
Салгыы Ольга Валерьевна аһынан-үөлүнэн хааччыйар бөдөҥ тэрилтэлэр салайааччыларын түмэн, тэрилтэлэргэ быһыыны ылыы наадатыгар мунньахтаабыт. Ол курдук, үүт собуота, килиэп кэмбинээтэ, көтөрү иитэр фабрика үлэһиттэрэ аска-үөлгэ куттал суох буолуутун хааччыйар туһуттан быһыыны ылыахтаахтарыгар сүбэлэммит.
Бэлэмнээтэ Женни Стрюкова
Хаартыска: интэриниэттэн