Бэҕэһээ, бүгүн Туймаада хочотугар Чурапчы улууһун күннэрэ ыытылыннылар. Ордожоникидзе болуоссакка үөрүүлээх тэрээһин, атыы-тутуу тэнийдэ.
Орджоникидзе болуоссатыгар сарсыардаттан муусука ыраахтан дьиэрэйэр. Бүгүн манна — Чурапчы улууһун күннэрин үөрүүлээхтик аһыы тэрээһинэ. Бэлиэ күнү оннооҕор күн чаҕылыччы тыган, лаппа сылыйан, таммах хото таммалаан, бэл, халлаан уруйдуу-айхаллыы көрүстэ. “Чурапчы” ТХПК олохтоох бородууксуйатыгар икки эрээтинэн уһун уочарат буолла.
Улуус баһылыга Степан Саргыдаев Чурапчы улууһун күнүнэн эҕэрдэлээн туран: “92 сыл анараа өттүгэр Боотуруускай улуустан арахсан, Чурапчы улууһа диэн улахан докумуоҥҥа илии баттанан, саҥа устуоруйаны тэрийэн, “Чурапчы – успуорт туоната”, “Чурапчы – тыа хаһаайыстыбатынан дьарыктанар”, “Чурапчы – туруу, чулуу үлэһит дьонноох” диэн күн бүгүҥҥэ диэри үлэлии-хамсыы сылдьабыт.
2022 сыл саха дьонугар-сэргэтигэр биир саамай бэлиэ сыл – Саха автономията тэриллибитэ 100 сылын саҕалаатыбыт. Чурапчы улууһа мантан туора турбакка, биллэр-көстөр дьоммутун, ол курдук, саха бастакы романиһа, уопсастыбаннай диэйэтэл, суруйааччы Семен Яковлев-Эрилик Эристиин төрөөбүтэ 130, саха суругун-бичигин төрүттээбит, үөрэнэхтэнэрбитигэр кылаатын киллэрбит киэн туттар киһибит Семен Новгородов төрөөбүтэ 130, Саха сирин биллэр-көстөр дуоктара, сир боппуруостарыгар улахан кылаатын киллэрбит учуонайбыт Георгий Башарин төрөөбүтэ 110, култуура эйгэтигэр Анастасия Лыткина, успуорт эйгэтигэр Константин Постников курдук үбүлүөйдээх дьоммут тэрээһиннэрин ыытабыт.
Бүгүн эһигини көрөн үөрдүбүт. Бэйэ-бэйэҕитин кытта алтыһан, кэпсэтэн тарҕаһаргытыгар баҕарабыт. Биир дойдулаахтарбытын быйылгы Үрүҥ тунах ыһыахпытыгар ыҥырабыт”, — диэн санаатын тиэртэ.
Чурапчыттан төрүттээх Дьокуускай куорат олохтооҕо Михаил Друзьянов: “Бу тэрээһин сөптөөх. Бииринэн, бүгүн – кулун тутар 25 күнүгэр улууспут тэриллибит күнэ. Иккиһинэн, мин хасыһан булбут биир дойдулаахпыт И.Н. Винокуров бүгүн эмиэ төрөөбүт күнэ. Эдэр баһылык норуотун түмэр соруктаах болуоссакка биир дойдулаахтарын муспута кэрэхсэбиллээх, утарыта көрсөн кэпсэтэрбит олус үчүгэй.
Бэҕэһээ Национальнай бибилэтиэкэҕэ буолбут тэрээһин бэркэ ааста. Кырдьык даҕаны, Иван Николаевич Винокуров курдук бөдөҥ, сэбиэскэй салайааччы баарын биллилэр-көрдүлэр. Ситэ үөрэтиллэ илик эбит диэн архыып үлэһиттэрэ Винокуров үһүс кинигэтин оҥоруох буоллулар. Бу биир киһини агитациялааһын буолбатах, ити кэмҥэ олорбут Ойуунускай, Аммосов, Барахов, Васильев бииргэ үлэлээбит үлэлэрин түмүгэ. Онон кинигэнэн оччотооҕу биллэр-көстөр дьон үлэтин барытын көрдөрөбүт. Иккис кинигэҕэ 100 ахсаанынан И.Н. Винокуров дакылааттара тахсыбыта суолтаах. Сахалары үөрэхтээбит киһинэн И.Н. Винокуров эбит диэн бэлиэтээтилэр. Манна кэлээт, аҕыс сыл иһигэр 350 саханы барыларын ааҕар, суруйар гыныахпыт диэбитин бэҕэһээ эмиэ тоһоҕолоон эттилэр. Бэрэссэдээтэл буолан баран биһиги дьоммут сахалыы билбэттэр, онон бары саха тылын үөрэтиэхтээххит диэбитэ. Онон кини ити икки суолга улахан өҥөлөөх”, — диэн эттэ.
Улуус олохтоох ансаамбыллара ырыа, үҥкүү эгэлгэтин туруордулар, болуоссакка мустубут биир дойдулаахтарын, куорат олохтоохторун эҕэрдэлээтилэр.
Людмила ПОПОВА, “Саха сирэ” хаһыат, edersaas.ru