Дьокуускайга быстах кэмҥэ олорор олорор пууҥҥа бары усулуобуйаны тэрийдилэр
Саха сирэ бу күннэргэ байыаннай дьайыыттан куотан кэлбит ДНӨ уонна ЛНӨ олохтоохторугар федеральнай киинтэн үбүнэн өйөбүл оҥоһуллар эрэгийиэннэр ахсааннарыгар киирдэ.
Ол курдук, 235 тыһ. солкуобай “беженецтэр” аһыылларыгар уонна олороллоругар көрүллүөҕэ. Бу туһунан СИА Yakutia.aif.ru иһитиннэрэр ситим ааҕыныстыбатыгар сигэнэн суруйар. Саха сиригэр 300-чэкэ ДНӨ-тэн уонна ЛНӨ-тэн кэлбит дьон өрөспүүбүлүкэ соҕуруу оройуоннарыгар уонна Дьокуускайга олороллор. Сорохтор – аймахтарыгар, атыттар – быстах кэмҥэ олорор уопсайдарга. Дьокуускайга бу икки өрөспүүбүлүкэлэртэн кэлбит дьоҥҥо быстах кэмҥэ олорор пуун Дьокуускайдааҕы индустриальнай-педагогическай кэллиэскэ аһыллыбыта. «Куотан кэлээччилэргэ анаан үс этээс бэриллибитэ. Бастакы этээскэ пуун дьаһалтата уонна мэдиссиинискэй хос. Уоннааҕыта — олорор хостор. Билиҥҥи туругунан 114 киһиэхэ анаан тэриллибит пууҥҥа 18 киһи олорор. Онтон алтата — оҕолор.
Дьокуускай куорат мээрийэтэ куотан кэлээччилэргэ тустаах усулуобуйаны толору тэрийбит. Пуун администратора Лена Тастыгина иһитиннэрбитинэн, Украинаттан кэлбит дьон быстах олорор сирдэригэр ыам ыйыгар СӨ Инновация уонна сыыппара сибээһин сайдыытын миниистирэ Анатолий Семенов кэлэн сокуоннай сааһын ситэ илик түөрт оҕоҕо мобильнай төлөпүөннэри бэлэхтээбит. Ыччат ассамблеятын бэрэстэбиитэллэрэ оҕолору кытта көрсөллөрүгэр, эрдэттэн ыйыталаһан, кинилэргэ сөптөөх таҥаһы аҕалбыттар. Куорат Дууматын салайааччытын солбуйааччы Дмитрий Васильев дьону быстах кэмҥэ олордор пуун олохтоохторун кытта көрсөн баран, дьон туохха наадыйалларын барытын толуйбут. Онон билигин «беженецтэр» бытовой тиэхиньикэнэн, вентилятордарынан хааччыллан олороллор.
Сиһилии ДНӨ-тэн уонна ЛНӨ-тэн кэлбит дьону кытта кэпсэтиини, кинилэр бүгүҥҥү олохторун-дьаһахтарын туһунан чэппиэрдээҕи «Саха сирэ» хаһыакка ааҕыҥ.
Елена ПОТОЦКАЯ, «Саха сирэ» хаһыат.