Бүгүн, муус устар 26 күнүгэр, РФ Атыыга-эргиэҥҥэ уонна бырамыысыланнаска миниистирэ Денис Мантуров Ил Дархан Айсен Николаевы кытта «Хаҥалас» Индустриальнай пааркаҕа уонна Дьокуускайдааҕы IT-пааркаҕа сылдьан, олохтоох оҥорон таһаарыыны билистилэр.
edersaas.ru
«Пластиктан турба, хочуолунай оҥорор тэрилтэлэр, норуот уус-уран оҥоһуктара, итиэннэ аныгы IT-бородууксуйаны оҥорооччулар инникитин сайдар кэскиллээхтэр диэн сыаналаатым. Былырыын ахсынньыга эрэ аһыллыбыт IT-пааркаҕа билигин саҥа резиденнэргэ миэстэ суоҕа манна саҥа технологиялары олоххо киллэрии күүскэ сайдыбытын туоһулуур. Саҥа саҕалааччыларга айан таһаарыыларын, бырайыактарын ырыынак киэҥ эйгэтигэр таһаарарга бары усулуобуйа тэриллэр эбит. Аны 2021 сылтан Жатайдааҕы өрүс аалларын тутар, өрөмүөннүүр үрдүк технологиялаах собуот гражданскай суудуналары оҥорон таһааран, олохтоох экэниэмикэни саҥа үрдэлгэ таһаарыа», — диэн санаатын үллэһиннэ федеральнай миниистир Денис Мантуров.
«Бырамыысыланнай бородууксуйа Сахабыт сиригэр табаары уонна өҥөнү оҥорон таһаарыы уопсай кээмэйигэр олох кыра өлүүнү (1% арыый ордугу) ылар. Онон “Хаҥалас” урутаан сайдар сир, ювелирнай, күндү тааһы кырыылыыр салаа, IT-паарка, Жатайдааҕы өрүс аалларын тутар, өрөмүөннүүр үрдүк технологиялаах собуот кэлэр кэмҥэ Дьокуускайга бырамыысыланнас сэргэхсийэн, индустриальнай сайдыы барарыгар сүрүн тирэх буолуохтара», — диэн түмүктээтэ Ил Дархан Айсен Николаев.
Онон киин куораппытыгар бырамыысыланнас сайдан, саҥа үлэ миэстэтэ тэриллиэ, дьон олоҕун уйгута тупсуо.
Марианна ТЫРТЫКОВА, «Саха сирэ» хаһыат, edersaas.ru