Дьокуускайга бырабыыталыстыба 2021 сыллааҕы үлэтин түмүк отчуота буолла
Дьокуускайга 2022 сылга Өлүөнэ эбэҕэ кытылы бөҕөргөтөр бырайыагы оҥоруохтара. Ону сэргэ, Дьокуускайга куорат таһынааҕы маршруттарга оптуобус пааркатын олоччу саҥардыахтара. Бу туһунан Бырабыыталыстыба Бэрэссэдээтэлэ Андрей Тарасенко иһитиннэрдэ. Видеосибээһинэн отчуокка куорат уонна таһынааҕы нэһилиэктэр кытыннылар.
“Дьокуускай – дойду саамай улахан эрэгийиэнин киин куората, манна өрөспүүбүлүкэ олохтоохторун үс гыммыттан ордуга олорор. Саха сирин баһылыга бырабыыталыстыба уонна куорат салалтатын иннигэр Дьокуускайы тупсаҕай оҥорор, ирбэт тоҥҥо тутуллубут бастыҥ куорат буоларын курдук дьаһанарга сорук туруорбута”, — диэтэ Андрей Тарасенко.
Санаттахха, 2021 сылга Саха сирин баһылыга Айсен Николаев 2032 сылга диэри Дьокуускай куорат сайдыытын туһунан ыйаахха илии баттаабыта. Бу ыйаах куорат уон сылга сайдыытын тумус тутуллар соруктарын чопчулуур. Ол курдук, табыгастаах уонна бигэ тирэхтээх куорат эйгэтин тэрийии, инфраструктура хаачыстыбатын үрдэтии, уопсастыбаннай тырааныспарка куттал суох буолуутун хааччыйыы, дьон олоҕун уйгутун тупсарыы соруктара.
2022 сылга өрөспүүбүлүкэҕэ уопсастыбаннай тырааныспары толору саҥардыахтара. Өрөспүүбүлүкэ 100 сылынан 100 оптуобуһу атыыластылар, сороҕо хайы-үйэ куоракка кэлбитэ. Онтон ордуга муус устар 10 күнүгэр диэри аҕалыллыаҕа. Бу саҥа оптуобустар чугастааҕы оройуоннары сэргэ Саха сирин соҕуруу оройуоннарыгар сырыыны хааччыйыахтара.
2022 сылтан 2024 сылга диэри Дьокуускайга 105 км уулусса-суол ситимин тупсаран оҥоруохтара, ол иһигэр “Куттала суох хаачыстыбалаах суоллар” нацбырайыагынан. Былырыын 48 км суолу өрөмүөннээбиттэрэ. Билигин киин куоракка Ленин проспегын хапытаалынай өрөмүөнүн бастакы түһүмэҕэ ыытылла турар. Кулаковскайтан Орджоникидзе болуоссатыгар диэри учаастагы 2022 сыл алтынньы ыйыгар диэри түмүктүөхтэрэ.
2023 сылга диэри куораты (Табаҕа сэл. Тулагыга диэри) ууттан көмүскүүргэ инженернэй тутуу бырайыага бэлэм буолуоҕа. “Ленгипроречтранс” кытта госхантараак түһэрсилиннэ. Маныаха эбии федеральнай үп туһаныллыаҕа.
Быйыл эпидбалаһыанньанан Саха сирин бырабыыталыстыбатын отчуота онлайн-көрүҥүнэн ыытыллар. Быһа эфирдэргэ уонна видеосибээһинэн холбонууга 14 тыһ тахса киһи кытынна.
Саха сирин Ил Дарханын уонна Саха Өрөспүүбүлүкэтин Бырабыыталыстыбатын пресс-сулууспата
Хаартыска: Мария Васильева түһэриитэ (СИА)
Бэлэмнээтэ Женни Стрюкова