Дьокуускай куоракка оскуолалары кэҥэтэн тутуу барар. Бу биир өттүнэн үөрэх тэрилтэлэрин саҥардыы буолар.
Бэҕэһээ, олунньу 18 күнүгэр, 5 №-дээх оскуолаҕа эбии эбийиэги (пристрой) тутуу саҕаланна. СӨ судаарыстыбаннай тутууга уонна олорор дьиэ надзорун управлениетын пресс-сулууспата иһитиннэрбитинэн, саҥа тутуу 45 миэстэлээх буфеттаах, социальнай педагог, психолог кэбиниэттэрдээх, кылаастардаах, лабаратыарыйалардаах, тренажернай саалалаах уонна үөрэнээччилэр сынньанар хостордоох буолар.
Дьокуускай куорат үөрэҕин управлениетын начаалынньыга Алексей Семенов «Бу нэдиэлэттэн бэдэрээтчит сыбаайалары түһэрэн саҕалаата, былаан быһыытынан, бу сыл бүтүүтэ үлэҕэ киириэҕэ”, — диэн иһитиннэрдэ. Дьокуускай куорат Пригороднай сэлиэнньэтигэр 12 №-дээх оскуолаҕа 326 миэстэлээх, үс мэндиэмэннээх уонна Хатаска 120 миэстэлээх эбии эбийиэктэри тутуу саҕаланна.
Мээр этиитэ
Бу нэдиэлэ саҥатыгар “Саха сирэ” хаһыат «Сэмсэ кэпсэтии” диэн бырайыагар Дьокуускай куорат аҕа баһылыга Евгений Григорьев кыттыбыта. «Саха сирэ» хаһыат сүрүн эрэдээктэрэ Чокуур Гаврильев үүннээн-тэһииннээн ыытта. Кэпсэтиигэ киин куоракка оскуоланы уонна оҕо саадын тутуу боппуруостара таарыйыллыбыттара.
— Оҕо саадын тутуу этэҥҥэ бара турар эрээри, өссө тэтэмириэн наада. Сыыппараларынан ытаһалыыр буоллахха, билигин оҕо саадыгар 19 тыһ. кырачааннарбыт сылдьаллар. Ону тэҥэ, 12 тыһ. оҕо уочаракка турар. Маны быһаарарга судаарыстыбаннай оҕо саадтара эбии тутуллуохтаахтар уонна чааһынайдары элбэтиллиэхтээх.
Куоракка үөрэх эбийиэктэрэ «Үөрэхтээһини сайыннарыы» судаарыстыбаннай бырагыраама чэрчитинэн тутуллаллар. Онон 50 %-нын федеральнай бүддьүөт уйунар. Үс түһүмэҕинэн барыта 23 үөрэх эбийиэгэ тутуллуоҕа. Ол иһигэр, “Прометей” кыбаарталга 900-чэ миэстэлээх оскуола тутуута киирэр. Баларга барыта 11,5 тыһ. оҕо үөрэниэҕэ. Үс оскуолаҕа эбии тутуу (пристрой) ыытыллар. Бу күннэргэ 5-с, 12-с №-дэрдээх оскуолаларга уонна Хатаска баар оскуолаҕа эбии тутуулар сыбаайалара түһэриллиэхтэрэ», — диэн Евгений Николаевич кэпсэтии кэмигэр иһитиннэрбитэ.