Аҕа дойдуну көмүскээччилэр күннэрин көрсө Дьокуускайга көрсүһүү буолла.
Бу тэрээһиҥҥэ бойобуой дьайыылар бэтэрээннэрэ, уопсастыбаннай түмсүүлэр, бэтэрээннэр холбоһуктара, судаарыстыбаннай былаас уорганнарын салайааччылара, норуот дьокутааттара, уо.д.а. кытыннылар.
Тэрээһин чэрчитинэн, үүнэр көлүөнэни төрөөбүт дойдуларыгар бэриниилээх, бэйэлэрин кыанар дьон буола улаатан тахсалларыгар, эдэр армеецтар хамсааһыннарын киэҥник тарҕатар уонна өрөспүүбүлүкэ оройуоннарыгар уопсастыбаннай түмсүүлэр көҕүлээһиннэрин өйүүр туһунан боппуруостары дьүүллэстилэр.
Бүлүүттэн, Горнайтан, Мэҥэ Хаҥаластан, Намтан, Уус Алдантан уопсастыбаннай түмсүүлэр бэрэстэбиитэллэрэ, бойобуой дьайыылар бэтэрээннэрэ тыл эттилэр.
Саха сиригэр уопсастыбаннай түмсүүлэргэ бойобуой дьайыыларга Афганистаҥҥа, Вьетнамҥа, Сирияҕа, Соҕуруу Осетияҕа кыттыбыт уопсайа 6000-тан тахса киһи баара бэлиэтэнэр. Бэтэрээннэр өлбүт саллааттар ааттарын үйэтитиигэ, байыаннай-патриотическай, байыаннай-спортивнай кулууптар, краеведческай көрдүүр-ирдиир, кадеттар уонна казактар холбоһуктарын, волонтер этэрээттэрин үлэлэригэр кытталлар.
СӨ Бырабыыталыстыбатын аатыттан тэрээһин кыттыылаахтарын вице-премьер Сергей Местников Аҕа дойдуну көмүскээччилэр күннэрэ чугаһаабытынан эҕэрдэлээтэ, бэтэрээннэргэ уонна саллааттар төрөппүттэригэр туһаайан төрөөбүт дойду туһугар хорсун, дьоруойдуу быһыыларын, эр санааларын бэлиэтээтэ. «Эһиги эйэлээх олоххо ыччаты иитии-үөрэтии үлэтигэр ылсаҕыт, бэйэҕитинэн үтүө холобур буолаҕыт, төрөөбүт дойдуну таптыырга, дойду устуоруйатыгар болҕомтолоох, аҕам саастаахтарга ытыктабыллаах буоларга үөрэтэҕит», — диэтэ кини. Бу үлэҕэ министиэристибэлэр, уопсастыбаннай түмсүүлэр, ассоциациялар күүстэрин түмэллэрэ, көрсүһүүлэри тиһигин быспакка тэрийэллэрэ наадатын бэлиэтээтэ.
Көрсүһүү түмүгэр биэдэмистибэннэй наҕараадалар, махтал суруктар, «300 лет российской полиции» РФ ИДьМ үбүлүөйдээх өйдөбүнньүк мэтээллэрэ туттарылыннылар.
СӨ Ил Дархан уонна Бырабыыталыстыба пресс-сулууспата
Мария Васильева (СИА) хаартыскаҕа түһэриилэрэ
+1
+1
+1
+1
+1
+1
+1