Бүгүн халыҥ былыт уонна үрүҥ туман быыһынан оргууй аҕай устан Дьокуускай куорат биэрэгэр, Даркылаахха Өлүөнэтээҕи биир кэлим өрүс пароходствотын причалыгар бастакы СОТ-1115 теплоход тигистэ. Иркутскай куорат Киренскэйиттэн Евгений Ладудко хапытааннаах сэттэ киһилээх экипаж биэс күн айаннаан, тутуу матырыйаалын, 1,5 тыһыынча туонна буруус маһы аҕалла.
edersaas.ru
Сахабыт сиригэр быйылгы навигацияны бастакынан саҕалаабыт экипаһы биэрэккэ «Өлүөнэтээҕи холбоһуктаах пароходство» үлэһиттэрэ, Дьокуускайдааҕы уу тырааныспарын институтун курсаннара, СӨ Бырабыыталыстыбатын чилиэннэрэ уруйдуу-айхаллыы көрүстүлэр. Өлүөнэ эбэҕэ муус бараатын кытта бастакынан суолу аспыт СОТ-1115 теплоход экипаһыгар Махтал суругу, «Ямаха» мотуору уонна күлүүс быһыылаах минньигэс туорду туттардылар.
Урукку дьыллартан олохсуйбут үтүө үгэс быһыытынан, пароходствоҕа бастакы борохуоту итинник чиэстээн-бочуоттаан өрө көтөҕүллүүлээх быһыыга-майгыга көрсөллөр.
Алексей Колодезников, СӨ Бырабыыталыстыбатын бэрэссэдээтэлин бастакы солбуйааччы:
«Былырыын бастакы суудунаны Жатайга көрсүбүппүт, быйыл Даркылаахха. Ону таһынан, Аллараа Бэстээххэ причал тутулла турар. Өлүөнэтээҕи биир кэлим өрүс пароходствотын хампаанньата бэҕэһээ уу түргэнник түһэр өрүстэригэр таһаҕас тиэйиитин номнуо саҕалаабыта. Бүгүн устар ааллар Аммаҕа киирдилэр, сотору бүтэй Бүлүү диэки барыахтара. Быйылгы навигацияҕа уопсайа өрүс флотун үлэһиттэрэ 1 мөлүйүөн 200 туонна таһаҕас тиэйиэхтэрэ, оттон өрөспүүбүлүкэҕэ 3 мөлүйүөн туонна таһаҕас кэлиэҕэ», — диэн бэлиэтээтэ.
Онон, бу сайын Сахабыт сирин өрүстэригэр 682 суудуна таһаҕас тиэйиитигэр тахсыаҕа. СӨ Тырааныспарын уонна суол хаһаайыстыбатын миниистирэ Александр Тарасов өрүс флотун үлэһиттэригэр бүгүн үөрүүлээх бэлиэ күн үүммүтүнэн эҕэрдэтин тиэртэ.
Пароходство генеральнай дириэктэрэ Сергей Ларионов этэринэн, Дьокуускайга өрүс пуордугар боротуоха уута түһэн, Өлүөнэтээҕи биир кэлим өрүс пароходствотын хампаанньата Даркылаахха туһунан причал туппута номнуо иккис сылын үлэлии турар. Манна соҕурууттан табаар тиэйэн аҕалбыт суудуналар тохтууллар уонна Арктика оройуоннарыгар аһы-үөлү, туттар малы тиэйэргэ контейнердары мунньан ыыталлар. Урут бу причалтан ыкса күһүн кыдьымах киириитэ мууһу алдьатар ледокол сылдьар этэ. Онтон уу таһыма түһэн, өрүс сүнньэ Аллараа Бэстээх диэки көһөн, ледокол Жатай анараа өттүгэр тохтуур.
СОТ-1115 теплоход хапытаана Евгений Ладудко: «Билигин уу таһыма үрдүк, онон суудуналар таһаҕастарын толору тиэнэллэр. Биһиги салгыы Мохсоҕоллоохтон Ленскэйгэ сиэмэн таһыахпыт. Быйыл 10-12 рейсэни оҥорор былааннаахпыт», — диэтэ.
Марианна Тыртыкова, «Саха сирэ», edersaas.ru