Атласовтар уһаайбаларыгар «Барбекю FEST» диэн гастрономическай бэстибээл буолла. Бу туһунан Дьокуускай куорат уопсастыбаннаһы уонна маассабай иһитиннэрэр сириэстибэлэри кытары үлэҕэ Департамена иһитиннэрдэ.
Тэрээһини СӨ ыалдьыттары көрсөргө анаан тэриллибит Ассоциация уонна куорат уокуруктааҕы дьаһалтата тэрийдилэр. Түһүлгэҕэ мустубут ыалдьыттар сибиэһэй салгыҥҥа астына-дуоһуйа сынньаннылар, сөҕүмэр үчүгэй стейк уонна шашлык амсайдылар диэн кэпсииллэр.
Күөн күрэскэ тоҕус тэрилтэ, олор ортолоругар профессионаллар да, бэйэлэрэ сөбүлээн астааччылар да кыттыбыттар. Кинилэр эттэн, балыктан бүлүүдэлэри бэлэмнээбиттэр.
«Кыттааччылар бэйэлэрин фирменнэй бүлүүдэлэрин астаатылар. Онон хас биирдии күрэстэһээччи чып кистэлэҥин арыйда. Ону сэргэ, кыттыбыт дьон бука бары үөрүйэхтэрин атастастылар, бэйэ-бэйэлэрин кытары ыкса билистилэр, доҕордостулар, бииргэ үлэлэһэргэ сүбэлэстилэр, саҥа бырайыактары толкуйдаатылар», — диэн бэстибээли тэрийээччилэртэн биирдэстэрэ Николай Атласов кэпсээбит.
Бары кыттааччылар үөрэ-көтө, ис сүрэхтэриттэн баҕаран туран кэлбиттэрэ харахха тута быраҕыллар диэн бэлиэтииллэр. Онуоха уокка ыһаарыламмыт сибиинньэ ойоҕоһун, ынах, сибиинньэ этин, креветкилэри, о.д.а. арааһы, ама, ким астына амсайбат буолуоҕай.
«Биһиги «Куба, сордоҥ уонна араак» үгэттэн композиция оҥордубут. Үгэҕэ сүрүн дьоруойдар ындыыларын бары тус-туспа тардыбыт буоллахтарына, биһиги бүлүүдэбитигэр бары эйэлээхтик биир сиргэ сыал-сорук туруорунан тардаллар. Онон ындыыбыт түмүккэ киирсэр ини диэн эрэнэбит«, — диэн «Mersi» кафе шеф-повара Станислав Мейченко санаатын үллэстибит.
Ас арааһын астааһыны, бүлүүдэ кырасыабайын бэлэмнээһини сэргэ, сибиинньэ оҕолорун сырсыылара көрү көҕүлүттэн туппут, муусука, ырыа ньиргийэн олорбут, маастар-кылаастар ураты сэргэхтик ыытыллыбыттар. «Барбекю FEST» бэстибээли тэрийээччилэр бу тэрээһин сыл ахсын ыытыллар буолуоҕа диэн этиилэрэ дьону-сэргэни улаханнык үөрдүбүт.
«Куорат уокуруктааҕы дьаһалтата, тэрийээччилэр уонна бэстибээл кыттыылаахтара «Барбекю FEST» сыл аайы ыытыллара үтүө үгэскэ кубулуйарыгар баҕардылар. Онон атырдьах ыйын бастакы өрөбүлүгэр Туймаада хочотун олохтоохторо уонна ыалдьыттара эмиэ үөрэ-көтө бу курдук түмсүөхпүт«, — диэбит Дьокуускай куорат баһылыгын солбуйааччытын э.т. Петр Ефремов.
Үөрүүлээх уонна долгутуулаах тэрээһин түмүгэр профессионалларга Гран-при «Лучший ресторан барбекю» үрдүк ааты «Mersi» кафе хамаандата ылан үөрүү-көтүү өрөгөйө буолбут. «За оригинальное оформление блюда» анал аат «Шашлыкофф» гриль-бар хамаандатыгар туттарыллыбыт. «За лучшее сочетание ингредиентов» —«Крыша» рестобар тиксибит. «За лучшую презентацию» кыайыылааҕынан «Понаехали» эрэстэрээн хамаандата буолбут. Биһирэбил бириис «Онегин» рестобаарга туттарыллыбыт.
Сөбүлээн астааччылар ортолоругар бэстибээл Гран-притин «Фейсбушка», «За популяризацию местных товаропроизводителей» «Алмаз- сделано в Якутии» хамаандалар ылбыттар, биһирэбил бириистэринэн «Бодрое утро» ырыаһыт Варя Максиманы уонна «Пропит» аһылыгы тиэрдэр сулууспа хамаандата наҕараадаламмыттар.