Дьокуускайга иллээхтик ыаллаһан олоруу, куоракка оҕолорго уонна улаатан эрэрэ оҕолорго аналлаах киин тэриллибитэ 50 сылынан, СӨ ИДьМ профессиональнай бэлэмнээһин киинигэр кэнчээри ыччакка VIII-с төгүлүн байыаннай-спортивнай оонньуулар саҕаламмыттарынан үөрүүлээх тэрээһин буолла.
Бырайыак чөл олоҕу тарҕатар, ыарахан балаһыанньаҕа түбэспит оҕолорго көмөлөһөр сыаллаах-соруктаах «Летний позитив» диэн онус төгүлүн ыытыллар бэстибээл чэрчитинэн ыытыллар. СӨ ИДьМ, «Якутское» РФ ИДьМ МТ, Дьокуускай куорат дьаһалтата, үөрэх управлениета, Дьокуускайга сокуоннай саастарын туола илик оҕолор дьыалаларыгар уонна бырааптарыгар хамыыһыйа, уокуруктар бырабылыанньалара уонна оҕолор кииннэрэ тэрийдилэр.
Үөрүүлээх, долгутуулаах тэрээһиҥҥэ мустубут бары ыалдьыттары Дьокуускай куорат баһылыга Сардаана Авксентьева эҕэрдэлээтэ: — Бука бары биир сиргэ түмсүбүккүтүттэн, бары олус сэргэххититтэн үөрэбин. Мин оҕолорго, улаатан эрэр кэнчээрилэргэ, эдэр ыччакка истиҥник сыһыаннаһабын, харыстыыбын. Эһиги хас биирдиигин туох интэриэстээҕэ, тугунан дьарыктанара, хайдах-туох үөрэнэрэ, олоҕо-дьаһаҕа миигин интэриэһиргэтэр. Маныаха мин оҕо барыта дьоҕурдаах диэн бэлиэтиибин. Бары тус-туһунан, бэйэ-бэйэҕитигэр майгыласпат дьоҕурдааххыт. Куруук үчүгэйгэ, кэрэҕэ, сырдыкка тардыһыҥ, ыра санаалаах буолуҥ, сайдыҥ, үөрэниҥ. Уопсастыбаҕа дьиҥ чахчы туһалаах, дьоһун дьон буоларга, куорат киэн туттар киһитэ буоларга дьулуһуҥ, тардыһыҥ, — диэтэ.
Икки күн устата ыытыллар күрэскэ 1,2,3,4 полиция отделын хамаандаларыгар «Берегиня» оҕо дьиэтиттэн, «Городской патруль» патриотическай кулууптан, «Здравствуйте» оҕолорго аналлаах педагогическай этэрээттэн, «Автобус радости» оҕо-ыччат кииниттэн, «Лайнер» авиамоделынан дьарыктанар кулууптан, «Автостоп» эдэр иниспиэктэрдэр хамсааһыннарыттан барыта 300 оҕо кыттар.
Ахсыс төгүлүн ыытыллар байыаннай-спортивнай оонньууга кыттааччыларга бу күн «Якутское» РФ ИДьМ МТ кавалерияҕа отделениетыттан, СӨ ИДьМ кинологическай сулууспатын кииниттэн, «Гром» анал сорудаҕы толорор этэрээттэн, СӨ ИДьМ наркотигы хонтуруоллуур управлениетыттан, ГИБДД управлениетыттан, Росгвардия байыастара бэйэлэрин сатабылларын көрдөрөн сөхтөрдүлэр. Маны сэргэ бойобуой сэп-сэбиргэл быыстапката болҕомтону тарта, «Внимание, розыск!» квест-оонньуу , тайҕа волейбола, доҕордоһуу биэчэрэ, о.д.а. араас бэртээхэй тэрээһиннэр ыытылыннылар.
Дьокуускай куорат уопсастыбаннаһы уонна иһитиннэрэр-биллэрэр маассайбай сириэстибэлэри кытары үлэҕэ Департамена.