Дьокуускайга бүтэһик сууккаҕа 56 киһи коронавирустаабыта билиннэ

Ил Дархан Айсен Николаев бүгүн, ыам ыйын 25 күнүгэр, коронавирус дьаҥа тарҕанарын төрүөтүнэн, дьон-сэргэ мааската суох сылдьыытын сэргэ, ирдэбиллэри тутуспаттара буоларын ыйда.

—Дьокуускайга, бүтэһик сууккаҕа 56 киһи коронавирус дьаҥар хаптарбытын анаалыстара көрдөрдө. Бэлиэтээн эттэххэ, Дьокуускай куоракка коронавирустаабыт дьон ахсаана биллэ элбээтэ. Өрөбүл күннэргэ 169 киһи ыалдьыбыта бэлиэтэнэр, — диэтэ кини.

Ил Дархан коронавирус дьаҥын тарҕаппат, бохсор туһуттан бары ирдэбиллэри кытаанахтык тутуһарга, маасканы булгуччу кэтэргэ эттэ. Итиэннэ бары тэрилтэлэр салайааччылара эппиэтинэһи өссө үрдэтэллэригэр соруйда. Дьокуускайга балаһыанньа хайдах буолуута, ирдэбиллэри тутуһууттан тутулуктанарын тоһоҕолоон бэлиэтээтэ.