Сыыйа-баайа Дьокуускай куорат мас социальнай эбийиэктэрин саҥа, таас тутууларынан солбуйаллар. Ол курдук, бэҕэһээ Ил Дархан Айсен Николаев мас дьиэҕэ үлэлии олорбут “Ивушка” (Сайсары) уһуйаан таас дьиэҕэ көһөр аалай лиэнтэтин үөрүүлээх быһыыга-майгыга быста.
edersaas.ru
“Бүгүн Дьокуускай куоракка бүтэһик мас уһуйаан таас дьиэҕэ көстө. Оҕо саада үөрэх тэрилтэлэригэр турар ирдэбилгэ барытыгар эппиэттиир, оннооҕор бассейннаах. Бу барыта өрөспүүбүлүкэ үөрэххэ сыһыанын көрдөрөр. Биһиги өйдүүбүт, үбү-харчыны оҕо туһугар угуу – инники кэскили түстээһин”, — диэн Ил Дархан Айсен Николаев бэлиэтээн эппитин СИА суруйар.
Тустаах уһуйаан сүрүн уратытынан бассейн буолар. Ону таһынан, эти-хааны эрчийэр, муусуканан дьарыктанар киэҥ-куоҥ саалалардаах, бары миэбэлинэн, тэрилинэн толору хааччыллыбыт, уопсай иэнэ 4 тыһ. кв.м. кэриҥэ, 240 миэстэлээх. ⠀
Санатан эттэххэ, былырыын уопсай үөрэхтээһин бүтэһик мас оскуолата – 18-с нүөмэрдээх оскуола (Гимеин) саҥа дьиэҕэ киирбитэ. Оттон быйыл – уһуйаан.
Манна даҕатан эттэххэ, былаан быһыытынан сыл түмүктэниэр диэри “Айыы Кыһатын”, оҕо саада, Оҕо искусствотын оскуолатын, бибилэтиэкэни (203 микро-оройуон), уһуйаан (Сыырдаах), 25-с уонна 6-с нүөмэрдээх оскуолалары туттарыахтаахтар.
Людмила ПОПОВА, “Саха сирэ” хаһыат, edersaas.ru
⠀