Дьокуускайга «Азия оҕолоро» спортивнай оонньуулар уоттарын көрүстүлэр

Бэҕэһээ, ахсынньы 22 күнүгэр,  Өлүөнэ очуостарыгар үөрүүлээх быһыыга-майгыга уматыллыбыт бастакы кыһыҥҥы «Азия оҕолоро» норуоттар икки ардыларынааҕы спортивнай оонньуулар уоттара бүгүн Дьокуускайга кэллэ.

 Орджоникидзе болуоссатыгар уоту арыаллааччылары Саха сирин Ил Дархана Айсен Николаев, өрөспүүбүлүкэ бырабыыталыстыбатын бэрэссэдээтэлэ Владимир Солодов, Дьокуускай куорат баһылыга Сардаана Авксентьева, «Азия оҕолоро» оонньуулар норуоттар икки ардыларынааҕы  кэмитиэтин бэрэсидьиэнэ Дмитрий Глушко, Сахалин уобалаһын спорка, туризмҥа, ыччат бэлиитикэтигэр миниистирин солбуйааччы Егор Умнов уонна биатлоҥҥа Олимпийскай оонньуулар икки төгүллээх чөмпүйүөнэ Анна Богалий көрүстүлэр.

Айсен Николаев бүгүн устуоруйаҕа киирэр сабыытыйа туоһуларынан буолабыт диэн туран, Соҕуруу Сахалиҥҥа оонньуулар уоттарын уматыы «Азия оҕолорун» кыһыҥҥы саҥа кэмин саҕаланыытын кэрэһилиэҕин ыйда.

Оонньуулар уоттарын эстэпиэтэтэ Ленин проспегынан, Киров, Лермонтов уулуссаларынан салҕанан барда итиэннэ «Эллэй Боотур» Спорт дыбарыаһыгар түмүктэннэ. Манна факел ахсынньы 29 күнүгэр диэри харайыыга бэрилиннэ. Киин куорат олохтоохторо, ыалдьыттара «Эллэй Боотурга» кэлэн «Азия оҕолоро» кыһыҥҥы оонньуулар уоттарын кытта хаартыскаҕа түһүөхтэрин сөп.

Саҥа дьыл аҕай иннинэ, ахсынньы 31 күнүгэр, Оонньуулар уоттара Сахалиҥҥа тиийиэҕэ, онно уобалас бары 19 муниципальнай тэриллиитинэн эстэпиэтэ тэриллиэҕэ.

Санатан эттэххэ, бастакы кыһыҥҥы «Азия оҕолоро» норуоттар икки ардыларынааҕы спортивнай оонньуулар Соҕуруу Сахалиҥҥа 2019 сыл олунньу 8-17 күннэригэр ыытыллыахтара. Эдэр спортсменнар спорт аҕыс көрүҥэр күрэс былдьаһыахтара: хайаттан хайыһарынан түһүүгэ, сноубордка, биатлоҥҥа, хайыһарынан сүүрүүгэ, трамплинтан хайыһардаах ыстаныыга, фигурнай хаҥкылааһыҥҥа, шорт-треккэ уонна хоккейга.

Роман Попов

Хаартыскалар Интэриниэтэттэн ылылыннылар.