Ыам ыйын 9 күнүгэр ханнык да эрэгийиэҥҥэ Кыайыы параада буолбат, ол эрээри, 47 куорат үрдүнэн байыаннай авиация сөмөлүөттэрэ сэлэлии көтүөхтэрэ. Дьокуускай үрдүнэн, быһа барыллаан, сарсыарда 11 чааска көтүөхтэрэ диэн сабаҕаланар.
edersaas.ru
Москваҕа, Хабаровскайга итинник көтүүлэри эрэпэтииссийэлээбиттэрэ хас да хонно. Москваҕа, бэл, сарсын халлааны халыннаран, былыттары быһыта ытыалыахтаахтар. 2017 сыллаахха уонна былырыын былыттаах буолан, Москва үрдүнэн авиапараад буолбатах эбит. Ол эрээри, байыаннайдар быйыл ханнык да түгэҥҥэ буолуоҕа, намыһах соҕуһунан көтүөхпүт диэн эрэннэрэллэр. Бу курдук кинилэр сэрии бэтэрээннэрин чиэстииллэр.
Илиҥҥи байыаннай уокурук Чуумпу Акыйааннааҕы флотун уонна байыаннай-салгын авиациятын 100-тэн тахса сөмөлүөттэрэ, бөртөлүөттэрэ хас да бөлөххө арахсан, Байкалтан Чукоткаҕа тиийэ 14 куоракка таарыйыахтара. Байыаннай уокурук управлениетын салаайааччы Андрей Степанов этэринэн, манна бойобуой уопуттаах, бастыҥтан бастыҥ лүөччүктэр кыттыахтара.
Холобур, Хабаровскайга “Су-35” истребитель, “Су-34” бомбардировщик, “Ан-26”, “Ан-12”, “Ту-134” байыаннай-транспортнай сөмөлүөттэр, Ка-52 “Аллигатор”, Ми-8АМТШ “Терминатор” бөртөлүөттэр көтөллөрө биллэр. Камчаткаҕа “сверхзвуковой” диэн ааттанар “МиГ-31” истребителлэр, “Ил-38Н” сөмөлүөттэр көтүөхтэрэ.
Саха сиригэр ханнык сөмөлүөттэр кэлэллэр эбит? Дьэ, сарсын көрүөхпүт.
Ангелина Васильева, “Саха сирэ” хаһыат, edersaas.ru