Дьокуускайга Аныгы ускуустуба бэстибээлэ саҕаланна

Бөлөххө киир:

Бэс ыйын 2-8 күннэригэр Дьокуускайга Арассыыйатааҕы “Территория. Якутск” диэн аныгы ускуустуба бэстибээлэ аан бастаан буолар. Бүгүн тэрийээччилэр суруналыыстары ыҥыран, бэстибээл туһунан сиһилии кэпсээтилэр.

Бу олус интэриэһинэй бэстибээл буолар. Тоҕо диэтэр, манна аныгы худуоһунньуктар быыстапкалара, дойду бастыҥ тыйаатырдарын туруоруулара, уулуссаҕа көрдөрүллэр испэктээкиллэр, лиэксийэлэр, маастар-кылаастар, о.д.а. буолуохтара. Бэстибээл бырагыраамата олус киэҥ. Бырайыак РФ бэрэсидьиэнин гранынан үбүлэнэр.

Бэстибээлгэ “Полюс” диэн Саха сиригэр, Магадаҥҥа, Красноярскай кыраайга, Иркутскай уобаласка көмүһү хостуур хампаанньа спонсор буоларын быһыытынан, маннык тэрээһиннэр бастатан туран, бу эрэгийиэннэргэ ыытыллаллар. “Полюс” хампаанньа “Поюс. Золотой сезон” диэн куонкуруһу бу эрэгийиэннэргэ 2016 сылтан ыытар. Куонкуруска кыайбыт тыйаатырдар бэстибээлгэ кытталлар. Холобур, Дьокуускайдааҕы Үүнэр көлүөнэ тыйаатыр, Мииринэйдээҕи тыйаатыр испэктээкиллэрин көрдөрүөхтэрэ.

Бэстибээл арт-дириэктэрэ Роман Должанскай Москваттан видео-эҕэрдэ ыытта.

Саха сирин көрөөччүлэригэр уонна кыттааччыларыгар бэстибээл умнуллубат түгэннэри бэлэхтиэ диэн эрэнэбин. Дьокуускайга аан бастаан буолар, онон көрсүһүүнү тэһийбэккэ күүтэбит. Ханнык баҕарар бэстибээл уруккулартан атын, хатыламмат буолар. Туох ситиһиилэнэрэ, уос номоҕор киирэрэ, ханнык айымньы сириллэрэ – биллибэт. Саха сиригэр тыйаатыр ураты култуурата баар, көрөөччү бэйэтэ туспа көрүүлэрдээх. Маннык уустук кэмҥэ айар дьон түмсүөхтээхпит, бииргэ буолуохтаахпыт, — диэн кини эттэ.

“Полюс” хампаанньа уопсастыбаннаһы кытары сибээһин дириэктэрэ Виктория Васильева СӨ култуураҕа министиэристибэтигэр махтанна.

Биһиги хас да эрэгийиэҥҥэ бэстибээли ыыппыппыт, маннык бары өттүнэн өйөбүлү өссө көрсө иликпит. Маннык көхтөөх министиэристибэлээх, дьэ, табыллыбыт дьоҥҥут. Өрөспүүбүлүкэ 100 сылыгар анаммыт бэстибээл көрөөччүлэргэ сөбүлэтиэ диэн эрэллээхпит. Москва, Санкт-Петербург режиссердарын араас жанрдаах испэктээкиллэрин аҕаллыбыт. Бэстибээл кыттааччыларыгар киэҥ хабааннаах үөрэтэр бырагырааманы бэлэмнээтибит”, — диэн Виктория Васильева кэпсээтэ.

Биир интэриэһинэй көрүҥүнэн 2021 сылга “Кульминация” куонкуруска талыллыбыт 3 пьесаны ааҕыы буолуо. Манна артыыстар пьеса тиэкиһин саҥа ааҕан, оруолга киириилэрэ, режиссер үлэтэ, уо.д.а. көрөөччүгэ сонун көстүү.

Маны тэҥэ, Москватааҕы аныгы ускуустуба мусуойа “Человек и его ландшафты” быыстапканы Национальнай художественнай мусуойга бэс ыйын 4 күнүттэн от ыйын 17 күнүгэр диэри туруоруоҕа. Москватааҕы мусуой научнай отделын салайааччы Андрей Егоров эппитинэн, бу быыстапка икки түһүмэхтээх: бастакытынан, Киһи уонна тас эйгэ дьайсыыта, иккиһинэн, худуоһунньуктар Киһи ис эйгэтин арыйаллар, чинчийэллэр.

Аныгы ускуустуба айымньыларын сорох дьон өйдөөбөттөр, ол эрээри, үгүстэри толкуйдатар, ырытыыга, кэпсэтиигэ ыҥырар буоллаҕына, сыалын ситэр, — диэн кини эттэ.

СӨ култуураҕа миниистирин солбуйааччы Марина Силина Уһук Илиҥҥэ култуура сайдыытын өйүүр “Полюс” хампаанньаҕа махтанна.

Бу бэстибээл Дьокуускайга ыытылларын биһиги олус күүппүппүт. Аныгы ускуустуба бэстибээлэ ыытыллара – бу сайдыы бэлиэтэ, саҥа бырайыактар, саҥа дьону кытары билсии, үөрэнии, ылыныы, саҥа талааннары арыйыы буолар. Ол иһин култуураҕа хамсааһын тахсар. Өрөспүүбүлүкэ тыйаатырдара бэстибээлгэ көхтөө кыттыыны ылаллар. Испэктээкиллэргэ кэлиҥ, сылдьыҥ, санааҕытын этиҥ диэн ыҥырабыт, — диэн кини эттэ.

Ангелина Васильева, “Саха сирэ” хаһыат, edersaas.ru

Хаартыска: sakhagov.ru

+1
0
+1
0
+1
0
+1
0
+1
0
+1
0
+1
0