Дьокуускайга Аммосов уонна Ярославскай аатынан музейдары өрөмүөннүөхтэрэ

Ааптар: 
Бөлөххө киир:

Дьокуускайга Ярославскай уонна Аммосов аатынан музейдары өрөмүөннүөхтэрэ.

Саха сиригэр кэнники сылларга 30-тан тахса култуура уонна устуоруйа үйэлээх баайа чөлүгэр түһэрилиннэ. Чугастааҕы кэмҥэ Ем.Ярославскай аатынан музейы уонна М.К.Аммосов мемориальнай музей-дьиэтин саҥардан биэрэр былаан баар. Бу туһунан СӨ вице-премьерэ Сергей Местников судаарыстыбаннай харыстабылга баар култуура үйэлээх баайын эбийиэктэрин тупсарыыга туһуламмыт «төгүрүк остуолга» этэн турар.
Санатан эттэххэ, Ил Дархан Айсен Николаев 2019 сыллаахха саҕалаабыт «Пааматынньыктары харыстыаҕыҥ» бырайыак иитинэн, бу этиллибит музейдар өрөмүөннэниэхтэрэ. Бу бырайыагынан Таата улууһугар Чөркөөххө XIX үйэтээҕи үктүүр миэлиҥсэни сэргэ, аҕыс кырыылаах бабаарына иккис тыынын ылбыта. Мэҥэ Хаҥаласка Манчаары башнята чөлүгэр түһэриллибитэ, атын улуустарга гражданскай уонна Аҕа дойду уоттаах сэриитигэр ананан тутуллубут пааматынньыктар өрөмүөннэммиттэрэ.
Улахан эбийиэктэр «Култуураны уонна туризмы сайыннарыы» бырагырааманан федеральнай бүддьүөттэн үбүлэнэллэр.  Ол курдук, 2019 сыллаахха Өлүөхүмэҕэ XIX үйэтээҕи мас тутуу чөлүгэр түһэриллибитэ. Бу бырагырааманан иккис тыыннарын ылбыт Күөрдэмҥэ Николаевскай таҥара дьиэтэ уонна Дьокуускайга  Казначейство дьиэтэ быйыл аһыллыахтара.
Сергей Местников этэринэн, быйыл Ярославскай музейа, М.К.Аммосов музей-дьиэтэ уонна Таатта улууһугар Ытык Күөлгэ литература түмэлэ уонна Чөркөөх музейыгар култуура уонна устуоруйа уонча пааматынньыга реставрацияланыахтара.
Манна СӨ Култуура уонна устуоруйа эбийиэктэрин харыстыыр департамены салайар Николай Макаров Хаҥаласка Серго Орджоникидзе музей-дьиэтин быйыл өрөмүөннүүргэ бэлэмнэнии ыытылларын туһунан эбэн эттэ. Маны сэргэ, Дьокуускайдааҕы реальнай училище дьиэтин бырайыактыыр-сметнай докумуонун бэлэмнээһин түмүктэнэн эрэр. Онтон Мэҥэ Хаҥалас улууһугар Бүтэйдээххэ Мэҥэ Боҕуруоскай таҥаратын дьиэтин чөлүгэр түһэрии үлэтигэр бэлэмнэнии саҕаланыан сөп. Маныаха бырайыактыыр-сметнай докумуона өрөспүүбүлүкэтээҕи бүддьүөттэн үбүлэнэр. Итини таһынан, Дьокуускайга эр дьон прогимназиятын бырайыага оҥоһуллар. Онтон Ленскэй оройуонугар Витимҥэ Громовтар дьиэлэрин сөргүтэн оҥорууга спонсордары көрдөөһүн ыытыллар. Бэлиэтээн эттэххэ, Дьокуускайга СӨ норуодунай суруйааччыта Д.К.Сивцев-Суорун Омоллоон уонна Уус Алдаҥҥа Савва Егоров  дьиэлэрин чөлүгэр түһэриигэ муус устар 18 күнүгэр телемарафон ыытыллыахтаах.

Санатар буоллахха, Саха сиригэр билиҥҥи туругунан уопсайа 1873 устуоруйа кэрэһитэ — үйэлээх баай баара бэлиэтэнэр. Итинтэн 815 — РФ норуоттарын култууратын үйэлээх баайын  судаарыстыбаннай испииһэгэр киллэриллибиттэр. 19 — култуура нэһилиэстибэтин эбийиэгэ буолар сибикилээх. 1048 — үйэлээх баай эбийиэктэрэ. 14 — сүппүтүнэн ааҕыллаллар.

Хаартыскаҕа Мария Васильева (СИА) түһэриитэ

+1
0
+1
0
+1
0
+1
0
+1
0
+1
0
+1
0