Сарсын, ахсынньы 20 күнүгэр биһиги өрөспүүбүлүкэбит киин куоратыгар “Россия хоккейга сулустара” диэн Бүтүн Россиятааҕы хамсааһын чэрчитинэн албан аатырбыт хоккеистар кэлиэхтэрэ.
Кинилэри Россия хоккейга федерациятын толорооччу дириэктэрэ Алексей Киреев салайыаҕа. Бөлөх састаабыгар Олимпиада икки, аан дойду алта төгүллээх чөмпүйүөнэ, спорт үтүөлээх маастара, номоххо киирбит Борис Майоров, Россия сүүмэрдэммит хамаандатын вице-хапытаана, Наганотааҕы-98 Олимпиада үрүҥ көмүс призера, аан дойду икки төгүллээх чөмпүйүөнэ, спорт үтүөлээх маастара Алексей Морозов уонна “Нуучча танката” диэн аатынан биллэр олимпийскай чөмпүйүөн, спорт үтүөлээх маастара Андрей Коваленко бааллар.
Былаан быһыытынан кинилэр СӨ бырабыыталыстыбатын бэрэссэдээтэлин солбуйааччы Михаил Гуляевы, СӨ Спорка миниистирэ Георгий Балакшины уонна өрөспүүбүлүкэ хоккейга федерациятын президенэ, Ил Түмэн депутата Олег Тарасовы кытта көрсүөхтэрэ. Биллэн турар, сүрүн кэпсэтии – биһиги өрөспүүбүлүкэбитигэр шайбалаах хоккейы сайыннарыы туһунан буолуоҕа.
Оттон эбиэттэн киэһэ “Эллэй Боотур” Муус дыбарыаһыгар маастар-кылаас көрдөрүөхтэрэ. Түмүккэ аатырбыт спортсменнары кытта бииргэ хаартыскаҕа түһүү уонна кинилэртэн өйдөбүнньүк илии баттааһын ылыы тэриллиэҕэ.
Ити туһунан биһиэхэ Өрөспүүбүлүкэтээҕи шайбалаах хоккей спортивнай оскуолатын дириэктэрэ Владимир Хисамутдинов иһитиннэрдэ.