Атырдьах ыйын 19-20 күннэригэр «Наука – тыа хаһаайыстыбатыгар» ХХIV аан дойдутааҕы форума ыытылынна.
Форумҥа кыттыыны ыла Арассыыйа, Казахстан, Монголия, Беларусь, Болгария учуонайдара кэлбиттэр. Наука бу дьоһун түһүлгэтэ Арассыыйа Монголияны кытары дипломатическй сыһыаны олохтообута 100 сылыгар, Арассыыйа наукатын академиятын 300 уонна М.Г.Софронов аатынан Саха сиринээҕи тыа хаһаайыстыбатын научнай-чинчийэр институтун 60 сылларыгар ананна.
Форумҥа тыа хаһаайыстыбатын, тыа сирин сайыннарыы национальнай бырайыактарыгар, судаарыстыбаннай бырагыраамаларыгар тирэҕирэн, агро-промышленай комплекска инновационнай технологияны, наука ситиһиилэрин киллэрии, наука уонна үөрэхтээһин тэрилтэлэрэ бииргэ үлэлииллэрин хааччыйыы, эрэгийиэннэр уонна дойдулар икки ардыларыгар уопуту атастаһыы тула киэҥ кэпсэтии таҕыста.
Аан дойду үрдүнэн Covid-19 ыарыы ааҥнаабыт кэмигэр аһылык өттүнэн куттал суох буолуутун хааччыйыыга, олохтоох бородууксуйаны оҥорон таһаарыыга ураты болҕомто ууруллуохтааҕын эттилэр. Килиимэт уларыйыыта, сылыйыыта, сайын аайы кураанныыра, Сибиир уонна Уһук Илин тайҕаларыгар улахан баһаардар туруулара наукаҕа олоҕуран хара тыаны араҥаччылыыр итиэннэ ойуур уонна сир ресурсаларын түргэнник чөлүгэр түһэрэр үлэни-хамнаһы тэрийэри ирдиирин бэлиэтээтилэр.
Раиса Сибирякова, «Саха сирэ», edersaas.ru