Саха Өрөспүүбүлүкэтин Баайга-дуолга уонна сиргэ сыһыаннаһыыга министиэристибэтэ 14:36:000000:12644 итиэннэ 14:36:000000:20888 кадастровай нүөмэрдээх сир учаастактарын саҥа кыбартаалы тутууга анаан «Өрөспүүбүлүкэтэҕи ипотека ааҕыныстыбата» идэтийбит тутааччыга түүлэһиигэ биэрэр дуогабары түһэрсиини саҕалаата.
edersaas.ru
«Дьокуускай куорат» куораттааҕы уокурук «Байыаннай чаас» кыбартаалын кэлим тутуу» бырайыага инвестиционнай бырайыак бары ирдэбиллэригэр сөп түбэһэр. Билигин тутааччы территорияны былааннааһын уонна кыбартаалга дьиэни-уоту тутуу бырайыактарыгар кэккэ уларытыылары киллэрэ сылдьар.
Бу эбийиэк Покровскайдыыр суол сэттис километрыгар, уруккута байыаннай чаас турбут сиригэр баар. Былаан быһыытынан, аҕыс сыл устатыгар 345 тыһ. кв. м иэннээх олорор дьиэ, ол эбэтэр барыта холбоон 6589 кыбартыыралаах 66 элбэх кыбартыыралаах дьиэ тутуллуохтаах. Олорго социальнай инфраструктура — иитэр-үөрэтэр уонна эмп тэрилтэлэрэ, физкультурнай-чэбдигирдэр комплекстар, элбэх өҥөнү оҥорор киин, элбэх этээстээх хараастар баар буолуохтара. Ил Дархан Айсен Николаев дьаһалыгар сөп түбэһиннэрэн, бырайыагы олоххо киллэрии дьону хаарбах туруктаах дьиэлэртэн көһөрүү боппуруостарын быһаарарга итиэннэ «Олорор дьиэ-уот уонна куорат эйгэтэ» национальнай бырайыагынан үлэҕэ тирэх буолуоҕа.
Даҕатан эттэххэ, «Өрөспүүбүлүкэтэҕи ипотека ааҕыныстыбата» идэтийбит тутааччы» АУо «Олорор дьиэ-уот ипотекатын кирэдьииттээһин федеральнай ааҕыныстыбата» АУо (АО «ДОМ.РФ») уһун болдьохтоох ипотека кирэдьиитин ситимин сайыннарыыга эрэгийиэннээҕи оператора буолар. Киин куоракка ааспыт сылларга 16 элбэх кыбартыыралаах дьиэни тутан, үлэҕэ киллэрдэ. Бу туһунан Баайга-дуолга уонна сиргэ сыһыаннаһыы министиэристибэтин пресс-сулууспата иһитиннэрэр.
Раиса Сибирякова, «Саха сирэ» edersaas.ru