Бүгүн, тохсунньу 28 күнүгэр, киин куорат Дзержинскэй уулуссатын 16/2-гэр Дьокуускай куорат полициятын 4 №-дээх отдела аһылынна. Урукку сылларга манна 1 №-дээх отдел баара.
Үөрүүлээх тэрээһиҥҥэ ис дьыала миниистирэ, полиция генерал-майора Владимир Прокопенко, Дьокуускай куорат дьаһалтатын баһылыга Сардаана Авксентьева, Дьокуускай куорат полициятын начаалынньыга, полиция полковнига Николай Кульбертинов кытыннылар.
Сахалыы алгыс сиэрэ-туома толоруллубутун кэнниттэн бастакынан миниистир эҕэрдэлээтэ: «Бүгүн биһиги 4-с отделы аһарбытыгар, куорат нэһилиэнньэтэ элбээн иһэрэ, итинэн сибээстээн, үс отделга ноҕурууска үрдээбитэ төрүөт буолла. Бу дьиэ Дьокуускай куорат дьаһалтатын өйөбүлүнэн үлэҕэ киирбитинэн, баһылык Сардаана Авксентьеваҕа улахан махталбытын тиэрдэбит».
Кыһыл лиэнтэни үөрүүлээхтик кырыйыы кэнниттэн дьиэни кэрийэн көрүү буолла: дьуһуурунай чаас, дьону быстах кэмҥэ тутар камералар, кабинеттар… Бу үс этээстээх таас дьиэҕэ өрөмүөн ыытыллан, сибиэһэй кырааска сыта билигин да ааһа илик.
Саҥардыллыбыт дьиэлэммит полиция үлэһиттэриттэн дьон быраабын харыстыырга, бэрээдэги көрүүгэ, сокуону араҥаччылааһыҥҥа үрдүк ситиһиилэри күүтэбит.
Вера МАКАРОВА, «Саха сирэ» хаһыат, edersaas.ru
Хаартыскалар: ааптар түһэриилэрэ
