Дьокуускайга 33 уонна 21 №-дээх оскуолаларга хапытаалынай өрөмүөннэр ыытыллыахтара

Дьокуускайга 33 уонна 21 №-дээх оскуолаларга хапытаалынай өрөмүөннэр ыытыллыахтара.

Нэһилиэнньэҕэ 2021 сыллааҕы үлэни-хамнаһы отчуоттууругар Дьокуускай куорат дьаһалтатын баһылыга Евгений Григорьев Губинскай уокурукка ыытыллар тупсарыы, өрө тардыы үлэлэригэр болҕомтотун туһаайда. Сэһэргэһии сирэй көрсөн уонна тэйиччиттэн олорон сэһэргэһии көрүҥүнэн, куйаар ситиминэн ыытылынна.

2021 сыллаахха уокурукка 21 №-дээх орто оскуолаҕа хапытаалынай өрөмүөн саҕаламмыт. Бу үлэ быйыл салҕанар. 203 түөлбэҕэ 85 миэстэлээх дьааһыла-саад миэстэтэ булуллубут. «Хаарбах дьиэттэн көһөрүү» өрөспүүбүлүкэтээҕи аадырыстаах бырагыраама чэрчитинэн 14 кыбартыыраттан 40 киһи саҥаҕа көспүт. 202 уонна Бестужев-Марлинскай 10-гар, дьиэлэр тастарынааҕы сирдэр тупсаран оҥоһуллубуттар, өрө тардыллыбыттар. Оптуобустар сылаас тохтобулларын оҥоруу үлэтэ салҕаммыт. 2021 сылга уокурук сиригэр-уотугар «Кыайыы болуоссатыгар», «Алмазэригэнбаан», «Успуорт оскуолатын» таһыгар сылаас тохтобуллар баар буолбуттар. 202 түөлбэҕэ воркаут- былаһаакка тутуллубут.

2022 сылга 33 уонна 21 №-дээх оскуолаларга хапытаалынай өрөмүөннэр ыытыллаллара былааннаммыт. Маны таһынан, Богатырев уулуссатын 4/1  тиэргэнигэр тупсарыы үлэтэ салҕанар. Өрөспүүбүлүкэтээҕи аадырыстаах бырагырааманан, 11 кыбартыыраттан 25 киһи хаарбахтан саҥаҕа көһүөхтээх.

«Куттала суох хаачыстыбалаах суоллар» национальнай бырайыагы олоххо киллэриинэн, суол өрөмүөнүгэр уонна саҥалыы уларытан оҥоруу былааныгар сөп түбэһиннэрэн, быйыл Губинскай уокурукка Ленин проспегар, Хабаров уулуссатын учаастагыттан Краснояров уулуссатыгар диэри хапытаалынай өрөмүөн ыытыллар. Тайааһына 1.8 км. Маны таһынан, сылаас тохтобулу туруоруу үлэтэ салҕанар. Көрсүһүүгэ уокурук олохтоохторо доруобуйа харыстабылыгар, тиэргэни тупсарыыга, уопсастыбаннас көхтөөхтүк сынньанар усулуобуйатын тэрийиигэ сыһыаннаах ыйытыылары ордук хото биэрдилэр. Кыылы-сүөлү иитиигэ эппиэтинэстээх сыһыан, куорат олохтоохторун хаарбахтан саҥаҕа көһөрүү туһунан ыйытыылар эмиэ киирдилэр.

Евгений Григорьев хаарбахтан көһөрүү туһунан ыйытыыга хоруйдууругар, билигин бырагыраама иккис түһүмэҕэ олоххо киллэриллэрин санатта. Онно 2012 сыл тохсунньу 1 күнүттэн 2017 сыл тохсунньу 1 күнүгэр диэри хаарбаҕынан билиниллибит дьиэлэр киирэллэрин эттэ. Итиннэ Дьокуускайга 165 дьиэ баар. Салгыы манна даҕатан, Евгений Григорьев куорат салалтата кэнники икки сылга дьиэлэри хаарбаҕынан билиниигэ далааһыннаах үлэни ыыппыттарын бэлиэтээтэ. Ол түмүгэр, билиҥҥи туругунан хаарбаҕынан билиниллибит дьиэ ахсаана тыһыынчаттан тахсыбыт. Куорат олохтоохторун интэриэстэригэр икки сылга хаарбах туруктаах дьиэлэргэ тэхиньиичэскэй эспэртиисэни ыытарга харчы ууруллубут. Гражданнары көһөрүү өрөспүүбүлүкэтээҕи бырагырааматын сэргэ муниципальнай бырагыраама олоххо киллэриллэр. Маны сэргэ, сири-уоту кэлим сайыннарыы бырагыраама иитинэн дьону-сэргэни көһөрүүгэ киэҥ хабааннаах үлэ барар.

Губинскай уокурук Управатын салайар Гулжан Огонерова ааспыт сылга 203 түөлбэҕэ «Школа глобального образования» киирбитэ дьону-сэргэни улаханнык сэргэхсиппитин эттэ. «2021 сылга диэри Суорун Омоллоон, Ларионов аатынан уулуссалар өрөмүөннэммиттэрэ. Билигин олохтоохтор куорат баһылыгыттан үөрэх кыһаларын, култуура, доруобуйа харыстабылын тэрилтэлэриттэн чугас сылаас тохтобуллары элбэтэри көрдөһөллөр, туруорсаллар», — диир Гулжан Огонерова. Кини маны таһынан, иитээччилэргэ искибиэри тутарга уонна тиэргэннэри тупсарарга олохтоох көҕүлээһини өйүүр бырагыраамаҕа дьон-сэргэ кыттарын кэпсээтэ.

Дьокуускай куорат дьаһалтатын сыллааҕы үлэтин отчуотунан уокурукка көрсүһүүгэ санитарнай ирдэбили тутуһан туран 20, «Zoom» платформанан, социальнай ситиминэн  140-тан тахса киһи кытынна. Киирбит ыйытыылар, этиилэр боротокуолга киллэрилиннилэр итиэннэ быһаарыы ылылларыгар, хоруй бэлэмнэниллэригэр анаан тустаах салааларга тиэрдиллэллэр.

Уокурук дьаһалтатын 2021 сыллааҕы үлэтин нэһилиэнньэҕэ отчуота  тохсунньу 17-26 күннэригэр уокуруктарынан уонна куорат таһыгар ыытыллар.

Дьокуускай куорат дьаһалтатын пресс-сулууспата