Бүгүн, ахсынньы 1 күнүгэр, «Кыһын Саха сириттэн саҕаланар» бэстибээл иитинэн Дьокуускай куорат Ленин болуоссатыгар Саҥа дьыллааҕы харыйа уота сандаарыччы умайда. Бу алыптаах түгэни кытта тэҥҥэ өрөспүүбүлүкэбит 36 оройуонугар харыйа уота сандаарда.
Быйыл коронавирус пандемията туран, «Кыһын Саха сириттэн саҕаланар бэстибээл» онлайн киэбинэн ыытылынна. Онон, өрөспүүбүлүкэ сүрүн харыйатын уота холбонорун теле-эпиир кэмигэр көрдүбүт.
Эпиир кэмигэр Ил Дархан Айсен Николаев: «Кыһын Саха сириттэн саҕаланар» бэстибээл үгэскэ кубулуйбут тэрээһиннэрэ быйыл атыннык ыытылыннылар. Тэрээһиннэр барыта онлайн буоллулар. Ол эрээри, бүгүн аан дойду биһиги бырааһынньыкпытын көрөр кыахтанна», — диэн бэлиэтээтэ.
Урукку сылларга Саҥа дьыллааҕы харыйа уота сандаарыччы тыгар бырааһынньыгар Великэй Устюгтан Тымныы Оҕонньор кэлэн ыалдьыттыыра. Быйыл кини кэлбэтэ, быһа сибээһинэн үөрүүлээх бырааһынньыкка кыттыста уонна: «Кыһын чуолаан Саха сириттэн саҕаланар. Аны сотору кэминэн бүтүн планета Саҥа дьыллааҕы уоттарынан тыгыа, кыһын бары дьиэни киэргэтиэ. Бу сыл уустук да буоллар барыбытын күүскэ доҕордоһорго, бэйэ-бэйэбитигэр көмөлөөх буоларга үөрэттэ», — диэн эттэ.
edersaas.ru
Андрей Сорокин, Василий Винокуров хаартыскалара.