Дьокуускай куоракка Автодорожнай уулуссаҕа ханнык дьиэ үлэҕэ хайдах киирдэ?
Бу дьыл сэтинньи 19 күнүгэр “Дьокуускай куорат” дьаһалтата киин куоракка 11 кыбаарталга Автодорожнай уулуссаҕа элбэх кыбартыыралаах дьиэни үлэҕэ киллэриигэ көҥүл биэрдэ. Бу 9 этээстээх дьиэ бастакы уочарата буолар. Тутуута уһаабыт дьиэни Саха сирин бырабыыталыстыбатын өйөбүлэ суох тутар кыаллыбат этэ. Бырабыыталыстыба өрөспүүбүлүкэ бүддьүөтүттэн субсидия көрбүтүн таһынан бу дьиэҕэ сыһыаннаах боппуруостары быһаччы быһаарсыбыта.
Бу эбийиэги тутуу 2018 сылга тохтотуллубута, онтон сэтинньигэ СӨ Арбитражнай суутун уурааҕынан тутааччы “Монолит Строй” моҥкуруутунан билиниллибитэ. Кэлин бу тэрилтэ дириэктэригэр РФ ХК 201 ыст. 2 ч. Холуобунай дьыала көбүтүллүбүтэ.
Моҥкуруукка барар кэмигэр тутааччы элбэх кыбартыыралаах икки дьиэни тута сылдьара, балары тутууга өлүүлэһээччи дьон 500 мөлүйүөн солкуобайы киллэрбит этилэр. Дьонтон харчыларын ылан баран, тутааччы биир да дьиэтин ситэ туппатаҕа.
Эбийиэктэр тутуулара араас бэлэмнээҕинэн, өлүүлэһэн туттарыыга кыттыбыт дьон бырааптарын чөлүгэр түһэрии араас ньымаларынан ыытыллыбыта. Бастакы уочарат тутуллар дьиэҕэ өлүүлэспит дьон “Автодорожная 19” ЖСК тэринэн, өрөспүүбүлүкэ бүддьүөтүн көмөтүнэн дьиэлэрин ситэри туттулар. Оттон иккис уочараттаах тутууга харчыларын укпут дьон бырааптара Саха Өрөспүүбүлүкэтин Бырабыыталыстыбатын уонна “Гражданнар бырааптарын – өлүүлэһэн туттарааччы кыттыылаахтарын пуондата” (Москва к.) публичнай-быраап көрүҥнээх хампаанньа икки ардыларыгар 2019 сыллаахха түһэрсиллибит ньымаларынан чөлүгэр түһэриллиэхтэрэ.
Быйыл элбэх кыбартыыралаах икки дьиэ үлэҕэ киирбитэ уонна Автодорожнай уулусса 19 нүөмэригэр киирбит дьиэ үсүһүнэн үлэҕэ киирбит дьиэ буолар. Кэнники үс сылга Саха сиригэр маннык кыһалҕаҕа киирбит 11 дьиэ боппуруоһа быһаарыллыбыта, 955 киһи бырааба чөлүгэр түһэриллибитэ.
Өлүүлэһэн тутааччы быраабын көмүскүүр өрөспүүбүлүкэтээҕи пуонда пресс-сулууспата
Бэлэмнээтэ Женни Стрюкова
Хаартыска: тустаах саайтан