Дьокуускай куорат административнай хамыыһыйата сэтинньи 16 күнүгэр оптуобус пассажирдара мааска эрэсиимин төһө тутуһалларын бэрэбиэркэлээтэ.
Киин куоракка уопсастыбаннай тырааныспарга коронавирус дьаҥын бохсууга ирдэнэр миэрэлэр тутуһуллалларын күннэтэ көрөллөр-истэллэр. Бу үлэни Дьокуускай куорат уокуруктааҕы дьаһалтатын тырааныспарга хонтуруолун отделын исписэлиистэрэ уонна административнай хамыыһыйа ыытар.
Ол курдук, бэҕэһээ, сэтинньи 16 күнүгэр барыта 29 опутобуска — 19-с, 35-с, 20-с, 3-с, 2-с, 16-с, 41-с, 4-с, 1-кы, 18-с, 25-с №-дээх маршруттарга бэрэбиэркэ буолла. Оптуобустар 267 пассажирдарыттан түөрт киһи мааска эрэсиимин кэспитин бэлиэтээтилэр.
«Тустаах эрэсиими кэспит гражданнары кытта кэпсэтии ыытылынна. Инникитин боротокуол толорор гына полиция үлэһиттэрин кытта маннык үлэни ыытыахпыт«, — диэн административнай хамыыһыйа бэрэссэдээтэлэ Феликс Антонов иһитиннэрэр.
Санатан суруйдахха, РФ административнай быраабын кодексын 20.6.1. ыстатыйатынан үрдүк бэлэмнээх буолуу эрэсиимин быраабылаларын кэспиттэр сэрэтии ылыахтарын эбэтэр 1 тыһыынча солкуобайтан 30 тыһыынча солкуобайга диэри администратинай ыстараабы төлүөхтэрин сөп.
edersaas.ru
Хаартыска — СИА.