Олунньу 17 күнүнээҕи туругунан, өрөспүүбүлүкэҕэ 59 киһи коронавируснай инфекциянан ыалдьыбыта бигэргэннэ. Ол иһигэр, Дьокуускайга – 23, Мииринэйгэ – 7, Өймөкөөҥҥө – 6, Нерюнгригэ — 5, Томпоҕо — 4, Алдаҥҥа, Орто Халымаҕа — 3-түү, өссө 7 улууска 1-2-лии киһи ыарыйда.
Суукка иһигэр лабораториялар 1680 анаалыһы оҥордулар. Пандемия саҕаланыаҕыттан барыта 949 412 анаалыс оҥоһуллубут диэн Өрөспүүбүлүкэтээҕи суһал ыстаап салайааччытын солбуйааччы Ольга Балабкина иһитиннэрдэ.
Кини этэринэн, билигин 65-тэн аҕам саастаах, олоҕурбут ыарыылаах дьон коронавируһунан олус ыараханнык ыалдьаллар. Онон, төһө да ыарыы ахсаана намтаабытын иһин, сааһырбыт дьоҥҥутун харыстааҥ диэн кини этэр. Билигин оҕолор үөрэнэ таҕыстылар, кинилэр биллэрбэккэ сылдьан, ыарыыны аҕам саастаах аймахтарыгар сыһыарыахтарын сөп. Онон сэрэхтээх буолуохха наада, харыстанары умнумаҥ.
Ангелина Васильева, “Саха сирэ” хаһыат, edersaas.ru
Хаартыска: sakha.gov.ru