Бүгүн, балаҕан ыйын 13 күнүгэр, дойду үрдүнэн быыбар күнэ буола турар. Cаха Өрөспүүбүлүкэбитигэр араас таһымнаах 228 куоластааһын ыытылла турар: Хаҥаласка, Сунтаарга уонна Аммаҕа улуус баһылыгын уонна 103 сэлиэнньэ баһылыгын талыы. Маны таһынан алта оройуоҥҥа уонна 116 сэлиэнньэҕэ дьокутааттары быыбардааһын буола турар.
Киин куоракка Дьокуускайдааҕы дуумаҕа дьокутаакка быыбар буола турар. “Кыайыы 50 сыла” успуорт дыбарыаһыгар баар 716 №-дээх куоластыыр учаастакка 500 бүлүтүөн бэриллибититтэн, 46 киһи болдьоҕун иннинэ куоластыыр быраабынан туһаммыт. Бу туһунан учаастак бэрэссэдээтэлэ Андрей Максимов кэпсээтэ. Кини этэринэн, сарсыарда 08:00 чааска 46 киһи куоластаабыт, 10:00 чааска – 60 киһи, 12:00 чааска — 78 киһи, күнүс 15:00 чаастааҕы чахчынан — 121 киһи. Ол аата уопсайа 563 быыбардааччы испиэһэккэ киирбититтэн ити көрдөрүү 21,49 %-ҥҥа тэҥнэһэр.
Урукку быыбардары кытта тэҥнээн көрдөххө, куоластааһыҥҥа кэлии үчүгэйэ суох. Аны 18:00 чааска түмүктэри таһаарыахтара. Быыбардыыр учаастактарга 20:00 чааска куоластааһын түмүктэнэр, ол кэнниттэн бүлүтүөннэри ааҕыы саҕаланар.
Киин куорат атын куоластыыр учаастактарын көрдөрүүлэрэ маннык (күнүс 15.00 чааска):
708 №-дээх — 18,12%;
714 №-дээх — 18,89%;
715 №-дээх – 18,47%;
720 №-дээх – 19,71%;
721 №-дээх – 15,86 % быыбардааччы кыттыыны ылбыт.
Хотугулуу-Илиҥҥи федеральнай университет 1 кууруһун устудьуона Александр Николаев олоҕор бастакытын быыбарга кытынна. Кини этэринэн, бу тэрээһин куорат олоҕор, салгыы сайдарыгар улахан суолталаах, ол иһин куоластыыр учаастакка кэлэн бэйэтэ талбыт хандьыдаатыгар куоластаата. Бу бэлиэ түгэнинэн учаастак бэрэссэдээтэлэ Андрей Максимов эдэр быыбардааччыга өйдөбүнньүк бэлэҕи туттарда.
Родион Кривогорницын, «Саха сирэ» хаһыат, edersaas.ru
Ааптар хаартыскалара.