Бүгүҥҥү брифиҥҥэ иһитиннэрбиттэринэн, кэлиҥҥи сууккаҕа өрөспүүбүлүкэҕэ 110 киһи ыалдьыбыт.
Ольга Балабкина: “Дьокуускай куоракка ыалдьыбыт дьонтон улахан аҥаардара 18-35-гэр диэри саастаах эдэр дьон буолар. Онон сибээстээн, санитарнай-эпидемиологическай миэрэлэри тутуһаргытыгар ыҥырабыт”, — диэн эттэ.
Мэҥэ Хаҥаласка 14 киһи ыалдьыбытын, хонтуруолга туталларын, тустаах улуус сорох нэһилиэктэригэр хааччахтааһын миэрэлэрэ биллэриллибитин иһитиннэрдэ. “Өрүс суола аһыллан эрэр. Онон Мэҥэ Хаҥалас улууһунан айанныыр уонна Мэҥэ Хаҥалас олохтоохторо арыый уҕарыйбыт санитарнай-эпидемиологическай балаһыанньаны хат көбүппэт туһугар ыйыллыбыт миэрэлэри тутуһаргытыгар”, — диэн ыҥырда. Күн бүгүн реанимацияҕа 70 киһи сытарын санатта. Бэйэ доруобуйатыгар эппиэтинэстээхтик сыһыаннаһар ирдэнэрин эттэ.
Дьокуускайга – 62
Мэҥэ Хаҥалас улууһугар – 14
Бүлүү улууһугар – 7
Сунтаар улууһугар – 6
Амма улууһугар – 5
Кэбээйи, Уус Алдан улуустарыгар – түөртүү
Нам улууһугар – 3
Хаҥалас улууһугар – 2
Алдан, Өлөөн, Чурапчы улуустарыгар – биирдии киһи ыалдьыбыт.
Өрөспүүбүлүкэҕэ, уопсайа, 196 084 доза вакцина кэлбититтэн, 73,3 %-нын туруорбуттар. “Ыарыыны тохтотор биир эрэ суол баар – быһыы ылыы” — диэн өссө төгүл эттэ.
Людмила ПОПОВА, “Саха сирэ” хаһыат, edersaas.ru