Дьокуускайга Улуу Кыайыы 75 сылынан байыаннай тиэхиньикэ кэккэлээн айаннаата. Куорат олохтоохторун үгүстэрэ сөҕө-махтайа көрдүлэр. Байыаннай тиэхиньикэ тыаһа-ууһа, ньирилээн түһэн, сүрдээх.
Куорат киин уулуссаларынан ДОСААФ эрэгийиэннээҕи салаата муспут былыргы байыаннай тиэхиньикэ кэллиэксийэтэ: бронетранспортердар, ЗИС-5 грузовик, ГАЗ массыыналар, о.д.а. сүүрдүлэр. Ону тэҥэ, аныгы байыаннай тиэхиньикэ: БТР-70, БТР-80, о.д.а. эмиэ бааллар. Манна “Росгвардия”, Сэбилэниилээх күүстэр, бойобуой дьайыылар бэтэрээннэрэ кытыннылар.
Байыаннай тиэхиньикэ параадын кыттыылаахтара Кыайыы болуоссатыгар тиийэн, Аҕа дойду сэриитин буойуннарыгар анаммыт пааматынньыкка венок уурдулар.
Бу урукку тиэхиньикэ урут көрдөрүүгэ эрэ турбут буоллаҕына, бүгүн аан бастаан сүүрэн, параакка кыттыбыт. Быраҕыллыбыт тиэхиньикэни булан, өр кэмҥэ хомуйан, өрөмүөннээн, кырааскалаан, сүүрэр оҥорбуттар. Бу дьыаланан бастаан ДОСААФ салаатын урукку бэрэссэдээтэлэ Серей Черных дьарыктаммыт эбит. Ол туһунан билиҥҥи бэрэссэдээтэл Сергей Соболев кэпсээтэ.
Санатар буоллахха, бүгүн Москваҕа Кыайыы 75 сылыгар анаммыт параад буолаары турар. Бу күн, 75 сыллааҕыта, Кыһыл болуоссакка Сэбиэскэй Аармыйа сэбилэниилээх күүстэрэ парааттаабыттара.
Ангелина Васильева, “Саха сирэ” хаһыат, edersaas.ru
Хаартыска: интэриниэттэн.