Коронавирус ыарыыта чэпчэкитик ааһар буоллаҕына, оннук ыарыһахтары дьиэлэригэр амбулаторнай эмтэниигэ сытыараллар. “Стопкоронавирус.Якутия” сайт көрөрүнэн, бэс ыйын 8 күнүгэр Дьокуускайга 132 киһи амбулаторнай эмтэниини ылар.
Сорохтор тоҕо дьиэҕэ эмтииллэрий, балыыһаҕа киллэрбэттэрий диэн ыйыталлар. Балыыһа куойкатын ахсаана, быраастар кыахтара муҥура суоҕа биллэр. Оттон сорох дьоҥҥо коронавирус чэпчэкитик ааһар, сорохтор ыалдьыбыттарын букатын да билбэттэр. Онон 2 нэдиэлэ дьиэлэригэр олорон эмтэнэллэрэ ордук курдук. Быраастар кинилэри син биир кэтээн көрөллөр.
Амбулаторнай ыарыһах үһүс күнүгэр үрдүк кыраадыһа түспэт, бэргээн иһэр буоллаҕына, балыыһаҕа киллэриэхтээхтэр диэн РФ доруобуйа харыстабылын миниистирэ Михаил Мурашко “Бастакы” ханаалга интервьютугар эттэ.
— Балыыһаҕа киирбитин кэннэ, мэдиссиинэ көмөтүн, эмтэниини күүһүрдүөхтээхтэр, эбэтэр, эбии диагнозтыыр чинчийиилэри оҥорон, ыарыһах туругун ыарахан балаһыанньаҕа тиэрдиэ суохтаахтар. Эмтээһин кэмигэр саҕаланнаҕына, тактиканы тутуһан, сөпкө эмтээтэхтэринэ, бэргиирин тохтоттохторуна, киһи кылгас кэм иһигэр үтүөрэр, оннук холобурдар элбэхтэр, — диэн кини бэлиэтиир.
Бүгүҥҥү күҥҥэ өрөспүүбүлүкэ үрдүнэн 2611 киһи коронавируһунан ыарыйда, олортон 1285 киһи үтүөрдэ, 15 киһи тыына быһынна. 22 киһи ыарахан туруктаах, олортон 2 киһи ИВЛ аппарааттаах сыталлар.
Ангелина Васильева, “Саха сирэ” хаһыат, edersaas.ru
Хаартыска: интэриниэттэн.